(पेण)
पेण तालुक्यातील मुरलीधरनगर, पाटणोली येथे राहणारा ११ वर्षे ९ महिने वयाचा संस्कार रामकेवल चौधरी हा अल्पवयीन मुलगा घरातून बाहेर पडल्यानंतर बेपत्ता झाला असून, त्याचा शोध घेण्याचे आवाहन पेण पोलिस ठाण्याकडून करण्यात आले आहे.
पोलिसांनी दिलेल्या माहितीनुसार, संस्कार २ सप्टेंबर २०२५ रोजी सकाळी अकराच्या सुमारास आईकडून पैसे घेऊन “दुकानात जाऊन येतो” असे सांगून घराबाहेर गेला, मात्र तो घरी परतला नाही. कुटुंबीयांनी नातेवाईक आणि परिसरात सर्वत्र शोध घेतला, परंतु त्याचा काहीही ठावठिकाणा लागला नसल्याने शेवटी पेण पोलिस ठाण्यात तक्रार दाखल करण्यात आली.
हरवलेल्या मुलाची उंची साधारण ३ फूट ४ इंच असून बांधा मध्यम, रंग गोरा, केस आणि डोळे काळे आहेत. तो निळ्या रंगाचा हाफ शर्ट, पिवळ्या रंगाची टी-शर्ट, हिरव्या रंगाची चड्डी आणि काळ्या रंगाचे चप्पल घालून बाहेर पडला होता. त्याची बोलीभाषा हिंदी आहे. या मुलाबाबत कोणाला काही माहिती मिळाल्यास तात्काळ पेण पोलीस ठाणे (०२१४३–२५२०६६) किंवा जवळच्या पोलिस ठाण्याशी संपर्क साधावा, असे आवाहन पोलिस उपनिरीक्षक ए. एस. साळवे यांनी केले आहे.
