(रत्नागिरी / प्रतिनिधी)
शहरातील नाचणे रोड परिसरात रविवारी दुपारी भरधाव पांढऱ्या रंगाच्या चारचाकीने दुचाकीस्वाराला जोरदार धडक दिल्याची घटना घडली. या अपघातात दुचाकीस्वार गंभीर जखमी झाला असून, अपघातानंतर चारचाकीचा चालक कोणतीही मदत न करता पळून गेला. याप्रकरणी रत्नागिरी शहर पोलिस ठाण्यात गुन्हा दाखल करण्यात आला आहे.
पोलिसांकडून मिळालेल्या माहितीनुसार, समीर सुरेश पाटील (रा. रत्नागिरी) हे त्यांच्या ऍक्टिव्हा दुचाकी (क्रमांक MH-08-5-7447)वरून एस.टी. स्टँड येथून अभ्युदय नगरकडे जात होते. दुपारी सुमारे २.१५ वाजण्याच्या सुमारास नाचणे रोडवरील इब्राहीम सन्स दुकानासमोर ते पोहोचले असताना, कार्निवल गल्लीतून भरधाव वेगात आलेल्या अज्ञात पांढऱ्या चारचाकीने त्यांच्या दुचाकीला जबर धडक दिली.
या धडकेत समीर पाटील यांच्या उजव्या खांद्याला फ्रॅक्चर झाले असून, त्यांना किरकोळ दुखापतीही झाल्या आहेत. अपघातानंतर संबंधित चारचाकी चालक घटनास्थळावरून फरार झाला. समीर पाटील यांनी याबाबत रत्नागिरी शहर पोलीस ठाण्यात तक्रार दाखल केली आहे.
अज्ञात चालकाविरोधात भारतीय न्याय संहिता अधिनियम २०२३ अंतर्गत कलम २८१, १२५(अ), १२५(ब) तसेच मोटार वाहन कायद्यातील कलम १८४, १३४(ख)/१७७ प्रमाणे गुन्हा दाखल करण्यात आला आहे. पुढील तपास पोलीस करत आहेत.
