(चिपळूण)
तालुक्यातील दहिवली बुद्रुक निम्मेवाडी येथे एका घरात ५५ वर्षीय व्यक्तीचा मृतदेह आढळून आल्याने खळबळ उडाली आहे. अजय महादेव कदम (५५, सध्या रा. दहीवली बुद्रुक, निम्मेवाडी, चिपळूण, मूळ रा. करजुवे, संगमेश्वर) असे मृत व्यक्तीचे नाव आहे.
खबर देणाऱ्या व्यक्तीची मृत व्यक्तीच्या घराशेजारी आंबा आणि काजूची बाग आहे. ७ एप्रिल रोजी सायंकाळी ५:३० च्या सुमारास खबर देणारी व्यक्ती बागेत गेली असता, त्यांना घरातून कुजलेला वास आला. अत्यंत घाणेरडा वास येत असल्याने त्यांना शंका आली आणि त्यांनी तातडीने पोलिस पाटील यांना याबाबत माहिती दिली. त्यानंतर पोलिस पाटलांनी त्यातील गांभीर्य लक्षात घेत पोलिसांना कळवले. त्यानंतर पोलिस पाटील आणि पोलिसांनी घटनास्थळी धाव घेऊन घराचा दरवाजा उघडला. घरात अजय कदम हे मृत अवस्थेत आढळून आले. या घटनेची नोंद सावर्डे पोलिस स्थानकात आकस्मिक मृत्यू म्हणून करण्यात आली आहे.
त्यांचा मृत्यू नेमका केव्हा झाला आहे? तो कशामुळे झाला आहे? ते एकटेच राहत होते का? त्यांच्याकडे कोणी आले होते का? हा घात आहे की आत्महत्या आहे? याबाबत पोलीस तपास सुरु आहे.
