(नाशिक / वृत्तसंस्था)
नाशिकमधून महिला प्राध्यापिकेच्या ऑनलाइन छळाचा धक्कादायक प्रकार समोर आला आहे. महाविद्यालयीन काळापासून असलेल्या ओळखीचा गैरफायदा घेत माजी विद्यार्थ्याने प्राध्यापिकेला प्रेमसंबंधात ओढल्याचा आरोप असून, त्यानंतर खासगी व्हिडीओ आणि चॅट्स सार्वजनिक करण्याची धमकी देत ५ लाख रुपयांची खंडणी मागितल्याचे फिर्यादीत नमूद करण्यात आले आहे. या प्रकरणी गंगापूर पोलिसांनी संशयित आरोपी चेतन राजाराम आढे ऊर्फ राठोड याला अटक केली आहे.
पोलिसांकडून मिळालेल्या माहितीनुसार, चेतन राजाराम आढे ऊर्फ राठोड हा अंबड, जालना येथील रहिवासी असून, संबंधित महिला प्राध्यापिका ज्या महाविद्यालयात कार्यरत होत्या, त्या महाविद्यालयात तो पूर्वी विद्यार्थी होता. त्यामुळे दोघांची महाविद्यालयीन काळापासून ओळख होती. पुढे प्राध्यापिकेची दुसऱ्या महाविद्यालयात बदली झाली. मात्र, त्यानंतरही चेतनने त्यांच्याशी संपर्क कायम ठेवल्याचा आरोप आहे.
या जुन्या ओळखीच्या माध्यमातून संशयित आरोपीने प्राध्यापिकेचा विश्वास संपादन केल्याचे फिर्यादीत नमूद आहे. त्यानंतर त्याने त्यांना प्रेमसंबंधात ओढल्याचा आरोप करण्यात आला आहे. या काळात दोघांमध्ये ऑनलाइन संवाद सुरू होता. याच ऑनलाइन संपर्कादरम्यान प्राध्यापिकेचे खासगी स्वरूपाचे व्हिडीओ स्क्रीन रेकॉर्ड केल्याचा आरोप चेतनवर आहे.
त्यानंतर या खासगी व्हिडीओ आणि चॅट्सचा आधार घेत संबंधित महिलेवर दबाव आणण्यास सुरुवात झाल्याचे प्रकरणातून समोर आले आहे. व्हिडीओ आणि चॅट्स सोशल मीडिया किंवा अन्य माध्यमातून व्हायरल करण्याची धमकी देत संशयित आरोपीने ५ लाख रुपयांची खंडणी मागितल्याचा आरोप आहे.
या धमकीमुळे घाबरलेल्या महिला प्राध्यापिकेने अखेर पोलिस स्थानकात तक्रार दाखल केली. तक्रारीची गंभीर दखल घेत पोलिसांनी तपास सुरू केला आणि संशयित आरोपी चेतन राजाराम आढे ऊर्फ राठोड याला अटक केली.
या प्रकरणात ऑनलाइन छळ, धमकी आणि खंडणीच्या आरोपांच्या अनुषंगाने पोलिसांकडून तपास सुरू आहे. संशयित आरोपीकडील डिजिटल साधने, ऑनलाइन संभाषण तसेच इतर संबंधित पुराव्यांची पडताळणी केली जाण्याची शक्यता आहे. खासगी व्हिडीओ आणि चॅट्सचा वापर नेमका कशा प्रकारे करण्यात आला, तसेच या प्रकरणात आणखी कोणाचा सहभाग आहे का, याचाही तपास केला जात आहे. या प्रकरणात तपासातून आणखी माहिती समोर येण्याची शक्यता आहे.
