(खेड / वार्ताहर)
रत्नागिरी आणि सातारा जिल्ह्यांना जोडणाऱ्या खेड तालुक्यातील रघुवीर घाटात गुरुवार, दि. ३ सप्टेंबर रोजी रात्री पुन्हा मोठ्या प्रमाणात दरड कोसळल्याने या मार्गावरील वाहतूक पूर्णपणे बंद झाली आहे. डोंगर उतारावरील माती, दगड आणि मोठमोठ्या शिळा थेट रस्त्यावर आल्याने घाटाच्या दोन्ही बाजूंनी वाहनांची ये-जा थांबली आहे. परिणामी घाटमाथ्यालगतच्या सातारा जिल्ह्यातील सुमारे १५ ते २० गावांचा रत्नागिरी जिल्ह्याशी असलेला संपर्क विस्कळीत झाला आहे.
दरड कोसळलेल्या ठिकाणी अकलपे-खेड एसटी बस सकाळपासूनच अडकून पडली आहे. या बसमध्ये शालेय विद्यार्थी, महिला आणि इतर प्रवासी असल्याने त्यांना घाटातच थांबावे लागले आहे. रस्ता पूर्णपणे बंद झाल्यामुळे बस पुढे किंवा मागे घेणेही शक्य झालेले नाही. याशिवाय घाटमाथ्यावरील गावांतून खेडकडे शाळा, महाविद्यालय तसेच इतर कामांसाठी निघालेल्या प्रवाशांनाही दरड कोसळलेल्या ठिकाणीच थांबावे लागले आहे.
रघुवीर घाट हा सातारा आणि रत्नागिरी जिल्ह्यांना जोडणारा महत्त्वाचा मार्ग असल्याने या मार्गावरील वाहतूक बंद झाल्याचा थेट परिणाम घाटमाथ्यावरील गावांतील नागरिकांच्या दैनंदिन जीवनावर झाला आहे. शिक्षण, आरोग्य, बाजारपेठ आणि विविध कामांसाठी अनेक नागरिक खेड शहरात ये-जा करतात. मात्र, घाटातील वाहतूक ठप्प झाल्याने ही व्यवस्था कोलमडली असून शाळा आणि महाविद्यालयात जाणाऱ्या विद्यार्थ्यांनाही मोठ्या अडचणींचा सामना करावा लागत आहे.
दरड हटविण्यासाठी संबंधित यंत्रणा घटनास्थळी दाखल झाली असून रस्ता वाहतुकीसाठी खुला करण्याचे काम सुरू करण्यात आले आहे. मात्र, रस्त्यावर आलेले दगड मोठ्या आकाराचे असल्याने केवळ जेसीबीच्या साहाय्याने ते हटविणे कठीण जात आहे. त्यामुळे मोठ्या दगडांचे तुकडे करण्यासाठी ब्रेकरच्या साहाय्याने काम करण्यात येणार आहे.
मोठ्या प्रमाणात दरड कोसळल्याने संपूर्ण रस्ता मोकळा करण्यासाठी नेमका किती कालावधी लागेल, हे अद्याप स्पष्ट झालेले नाही. रस्ता पूर्णपणे सुरक्षित होईपर्यंत या मार्गावरून प्रवास करणाऱ्या नागरिकांनी खबरदारी घेणे आवश्यक आहे.
पावसाळ्यात रघुवीर घाटात वारंवार दरडी कोसळण्याच्या घटना घडत असल्याने या मार्गाच्या सुरक्षिततेचा प्रश्न पुन्हा एकदा ऐरणीवर आला आहे. दरड कोसळल्यानंतर केवळ मलबा हटविण्यापुरती कारवाई न करता घाटातील धोकादायक ठिकाणांची पाहणी करून कायमस्वरूपी उपाययोजना करण्यात याव्यात, अशी मागणी स्थानिक नागरिकांकडून होत आहे.
दरम्यान, घाटातील वाहतूक बंद झाल्याने सातारा आणि रत्नागिरी जिल्ह्यांदरम्यानची वाहतूक विस्कळीत झाली आहे. अडकलेल्या एसटी बसमधील प्रवासी तसेच इतर नागरिकांची गैरसोय लक्षात घेता प्रशासनाने दरड हटविण्याचे काम अधिक वेगाने करून हा मार्ग लवकरात लवकर वाहतुकीसाठी खुला करावा, अशी मागणी नागरिकांकडून करण्यात येत आहे.
