( मुंबई / वृत्तसंस्था )
बस्तरच्या निसर्गरम्य परिसराचा अनुभव घेण्यासाठी बाईकवरून निघालेल्या मुंबईतील 24 वर्षीय तरुणीचा छत्तीसगडमध्ये भीषण रस्ते अपघातात मृत्यू झाला. रिद्धी दिव्येश ठक्कर (वय 24, रा. कांदिवली पश्चिम, मुंबई) ही सुमारे 23 दुचाकीस्वारांच्या ग्रुपसोबत रायपूर ते बस्तर असा प्रवास तिच्या MH 13 SP 0835 दुचाकीवरून प्रवास करत होती. धमतरी जिल्ह्यातील राष्ट्रीय महामार्ग क्रमांक 30 वरील मरकाटोला घाटाजवळ बुधवारी हा अपघात झाला.
रिद्धीच्या दुचाकीला मागून भरधाव ट्रेलरने धडक दिल्याने ती गंभीर जखमी झाली. अपघातानंतर तिला तातडीने चरमा आरोग्य केंद्रात नेण्यात आले. प्राथमिक उपचारानंतर प्रकृती गंभीर असल्याने डॉक्टरांनी तिला धमतरी येथील श्रीराम रुग्णालयात हलवण्याचा सल्ला दिला. मात्र, रुग्णालयात डॉक्टरांनी तपासणीनंतर रिद्धीला मृत घोषित केले.
रायडिंग ग्रुपसोबत बस्तरच्या दिशेने प्रवास
रिद्धी ही रायपूर ते बस्तर टूर आयोजित करणाऱ्या सुमारे 23 बाईक रायडर्सच्या ग्रुपचा भाग होती. बुधवारी पहाटे 5 ते 6 वाजण्याच्या सुमारास ग्रुपमधील अनेक रायडर्स पुढे निघून गेले होते. रिद्धी आणि तिचे काही साथीदार मागे होते. याचदरम्यान मरकाटोला घाटाजवळ तिच्या दुचाकीला मागून आलेल्या ट्रेलरने जोरदार धडक दिली. धडकेनंतर रिद्धी दुचाकीवरून रस्त्यावर फेकली गेली. तिला गंभीर दुखापत झाली. घटनास्थळी गोंधळ उडाल्यानंतर 112 क्रमांकावर फोन करून मदत मागवण्यात आली. त्यानंतर जखमी रिद्धीला चरमा आरोग्य केंद्रात दाखल करण्यात आले.
ट्रेलर चालक वाहनासह फरार
अपघातानंतर ट्रेलर चालक वाहनासह घटनास्थळावरून फरार झाला. माहिती मिळताच पोलीस घटनास्थळी दाखल झाले असून त्यांनी तपास सुरू केला आहे. पोलिसांकडून परिसरातील सीसीटीव्ही फुटेज तपासले जात आहे. तसेच इतर मार्गांनीही ट्रेलरची ओळख पटवण्याचे प्रयत्न सुरू आहेत. रिद्धीसोबत प्रवास करणाऱ्या साथीदारांचे जबाब पोलिसांनी नोंदवले आहेत. रिद्धीच्या कुटुंबीयांना घटनेची माहिती देण्यात आली असून तिचा मृतदेह शवविच्छेदनासाठी पाठवण्यात आला आहे. फरार ट्रेलर आणि चालकाचा शोध घेणे हे पोलिसांसमोरचे मोठे आव्हान आहे.
‘Let’s Explore Bastar’ची शेवटची स्टोरी
रिद्धीच्या मृत्यूची माहिती समोर आल्यानंतर तिच्या शेवटच्या सोशल मीडिया पोस्टचीही चर्चा होत आहे. अपघाताच्या अवघ्या 15 तास आधी रिद्धीने Instagram वर स्टोरी शेअर केली होती. ‘Let’s Explore Bastar’ असे म्हणत तिने बस्तरच्या प्रवासाची उत्सुकता व्यक्त केली होती. मात्र, काही तासांतच हा प्रवास तिच्यासाठी अखेरचा ठरला.
मेकअप आर्टिस्ट आणि बाईक रायडर होती रिद्धी
रिद्धी ठक्कर ही मेकअप आर्टिस्ट म्हणून कार्यरत होती. गेल्या सुमारे तीन वर्षांपासून ती बाईक रायडिंग करत होती. नुकतेच कझाकिस्तानमध्ये झालेल्या आशियाई चॅम्पियनशिप मेकअप स्पर्धेत तिने भारताचे प्रतिनिधित्व केल्याची माहिती समोर आली आहे.
रिद्धीच्या अकाली निधनामुळे तिच्या कुटुंबीयांसह बाईक रायडिंग ग्रुपमधील साथीदारांना मोठा धक्का बसला आहे. अपघाताच्या वेळी ग्रुपमधील बहुतांश रायडर्स पुढे निघून गेले होते, तर काही जण रिद्धीसोबत मागे होते. याचदरम्यान हा भीषण अपघात झाला. सध्या धमतरी पोलीस अपघाताचा तपास करत असून, रिद्धीच्या दुचाकीला धडक देणाऱ्या ट्रेलरची ओळख पटवून चालकाला ताब्यात घेण्याचे प्रयत्न सुरू आहेत.
