(पुणे / वृत्तसंस्था)
राज्यातील शिक्षक आणि शिक्षकेतर कर्मचाऱ्यांसाठी महत्त्वाची बातमी समोर आली आहे. शालार्थ प्रणालीद्वारे वेतन घेणाऱ्या अंशतः अनुदानित, खासगी अनुदानित तसेच जिल्हा परिषदांच्या प्राथमिक आणि माध्यमिक शाळांमधील शिक्षक व शिक्षकेतर कर्मचाऱ्यांसाठी E-KYC प्रक्रिया पूर्ण करणे आता अनिवार्य करण्यात आले आहे. E-KYC प्रक्रिया पूर्ण न करणाऱ्या कर्मचाऱ्यांचे ऑगस्ट 2026 चे सप्टेंबरमध्ये अदा होणारे वेतन रोखण्यात येणार असल्याचे शिक्षण विभागाने स्पष्ट केले आहे.
शालार्थ प्रणालीतील संबंधित सर्व शिक्षक आणि शिक्षकेतर कर्मचाऱ्यांनी तातडीने E-KYC प्रक्रिया पूर्ण करावी, असे निर्देश देण्यात आले आहेत. विशेष म्हणजे, यापुढे E-KYC पूर्ण करण्यासाठी कोणतीही मुदतवाढ दिली जाणार नसल्याचे शिक्षण विभागाने स्पष्ट केले आहे. त्यामुळे सप्टेंबरमध्ये वेतन वेळेत मिळवायचे असल्यास संबंधित कर्मचाऱ्यांनी E-KYC प्रक्रिया प्रलंबित न ठेवता ती तातडीने पूर्ण करणे आवश्यक आहे.
दरम्यान, 28 जुलै 2026 रोजी वित्त विभागाच्या प्रधान सचिवांच्या अध्यक्षतेखाली झालेल्या आढावा बैठकीत शालार्थ प्रणालीतील सर्व संबंधित कर्मचाऱ्यांची E-KYC प्रक्रिया तातडीने पूर्ण करण्याचे निर्देश देण्यात आले. या बैठकीनंतर शिक्षण विभागाने E-KYC बाबतची कार्यवाही अधिक कठोर केली आहे. त्यामुळे यापुढे E-KYCसाठी मुदतवाढ मिळण्याची शक्यता नसल्याचे स्पष्ट झाले आहे.
शालार्थ प्रणालीद्वारे वेतन घेणाऱ्या शिक्षक आणि शिक्षकेतर कर्मचाऱ्यांनी आपली E-KYC प्रक्रिया पूर्ण झाली आहे की नाही, याची खात्री करणे आवश्यक आहे. E-KYC प्रलंबित असल्यास ती तातडीने पूर्ण करण्याच्या सूचना देण्यात आल्या आहेत. प्रक्रिया पूर्ण न केल्यास ऑगस्ट महिन्याचे वेतन सप्टेंबरमध्ये अदा करताना ते रोखले जाऊ शकते.
या निर्णयाची तातडीने अंमलबजावणी करण्याचे आदेश प्राथमिक शिक्षण संचालक शरद गोसावी आणि माध्यमिक व उच्च माध्यमिक शिक्षण संचालक डॉ. महेश पालकर यांनी दिले आहेत. त्यामुळे राज्यातील शालार्थ प्रणालीशी संबंधित सर्व शिक्षक आणि शिक्षकेतर कर्मचाऱ्यांनी E-KYC प्रक्रियेला प्राधान्य देण्याचे आवाहन शिक्षण विभागाकडून करण्यात आले आहे. विभागीय शिक्षण उपसंचालक, शिक्षणाधिकारी, शिक्षण निरीक्षक तसेच वेतन व भविष्य निर्वाह निधी पथकाच्या अधीक्षकांनी आपल्या कार्यक्षेत्रातील सर्व शाळांना E-KYC प्रक्रिया तातडीने पूर्ण करण्याबाबत सूचना देण्याचे निर्देश दिले आहेत.
वित्त विभागाने यापूर्वी जारी केलेल्या विविध शासन परिपत्रकांद्वारे संबंधित शिक्षक आणि शिक्षकेतर कर्मचाऱ्यांना E-KYC पूर्ण करण्याच्या सूचना वारंवार देण्यात आल्या होत्या. तसेच ही प्रक्रिया पूर्ण करण्यासाठी मे 2026 पर्यंत मुदतवाढही देण्यात आली होती. मात्र, मुदतवाढ देऊनही राज्यातील अनेक शिक्षक आणि शिक्षकेतर कर्मचाऱ्यांची E-KYC प्रक्रिया अद्याप पूर्ण झालेली नसल्याचे आढावा बैठकीत निदर्शनास आले आहे. त्यामुळे आता संबंधित कर्मचाऱ्यांनी कोणतीही दिरंगाई न करता E-KYC प्रक्रिया पूर्ण करावी, तसेच आपल्या कार्यक्षेत्रातील सर्व शाळांमध्ये या निर्णयाची तातडीने अंमलबजावणी होईल याची खात्री करावी, अशा सूचना शिक्षण विभागातील संबंधित अधिकाऱ्यांना देण्यात आल्या आहेत.
