( रत्नागिरी / वार्ताहर )
गेल्या दोन आठवड्यांपासून राज्यात धुमाकूळ घालणाऱ्या मुसळधार पावसाने आता काहीशी उसंत घेतली असून राज्यातील बहुतांश भागांत पावसाचा जोर लक्षणीयरीत्या कमी झाला आहे. सततच्या पावसामुळे जनजीवन विस्कळीत झाले होते. अनेक नद्या आणि ओढे दुथडी भरून वाहत होते, तर रस्ते पाण्याखाली गेल्याने वाहतूक विस्कळीत झाली होती. अनेक ठिकाणी दरडी कोसळणे, झाडे पडणे, घरांचे नुकसान तसेच शेतीचे मोठे नुकसान झाल्याने नागरिकांना मोठ्या संकटाला सामोरे जावे लागले. विशेषतः रत्नागिरी, सिंधुदुर्ग, रायगड, पालघर, पुणे, नाशिक आणि मुंबई या जिल्ह्यांना मुसळधार पावसाचा मोठा फटका बसला होता.
मात्र, सध्या पावसाने विश्रांती घेतल्याने परिस्थिती हळूहळू पूर्वपदावर येऊ लागली आहे. अनेक भागांत पाण्याची पातळी ओसरत असून वाहतूक आणि दैनंदिन व्यवहार सुरळीत होऊ लागले आहेत. तरीही अतिवृष्टीमुळे बाधित झालेल्या भागांमध्ये नुकसानभरपाईचे पंचनामे, रस्ते दुरुस्ती आणि वीजपुरवठा पूर्ववत करण्याचे काम युद्धपातळीवर सुरू आहे.
दरम्यान, पावसाचा जोर कमी झाल्याने राज्यातील अनेक भागांत उष्ण आणि दमट हवामानाची तीव्रता वाढली आहे. वातावरणात मोठ्या प्रमाणावर आर्द्रता असल्याने नागरिकांना प्रचंड उकाड्याचा सामना करावा लागत आहे. विशेषतः किनारपट्टी भागात दिवसभर घामाच्या धारांनी नागरिक हैराण झाले असून, पावसाळ्यातही उन्हाळ्यासारखी दमट परिस्थिती निर्माण झाली आहे.
हवामान विभागाच्या अंदाजानुसार, पुढील दोन ते तीन दिवस राज्यातील बहुतांश भागांत पावसाची उघडीप कायम राहण्याची शक्यता आहे. काही ठिकाणी हलक्या ते मध्यम स्वरूपाच्या सरी कोसळू शकतात. आजही राज्यातील काही जिल्ह्यांसाठी यलो अलर्ट जारी करण्यात आला असून, पुणे, सातारा आणि घाटमाथा परिसरात अधूनमधून मध्यम स्वरूपाच्या पावसाची शक्यता व्यक्त करण्यात आली आहे. घाटमाथा भागात आधीच मोठ्या प्रमाणात पाऊस झाल्याने दरडी कोसळण्याचा धोका कायम असून नागरिकांनी आवश्यक ती खबरदारी घेण्याचे आवाहन करण्यात आले आहे.
कोकणातही पावसाची विश्रांती
गेल्या आठवड्यात कोकणात मुसळधार पावसाने अक्षरशः कहर केला होता. अनेक ठिकाणी पूरस्थिती निर्माण झाली होती, तर काही गावांचा संपर्कही तुटला होता. मात्र आता परिस्थिती तुलनेने स्थिर झाली असून पावसाचा जोर कमी झाला आहे. पालघर, ठाणे, मुंबई आणि रायगड जिल्ह्यांत हलक्या सरींचा अंदाज आहे, तर रत्नागिरी आणि सिंधुदुर्ग जिल्ह्यांत हलका ते मध्यम स्वरूपाचा पाऊस पडण्याची शक्यता हवामान विभागाने वर्तवली आहे.
नागरिक उकाड्याने त्रस्त
मुंबई आणि उपनगरांमध्येही गेल्या काही दिवसांतील मुसळधार पावसानंतर आता पावसाने विश्रांती घेतली आहे. गुरुवारपासून शहरात पावसाचा जोर कमी झाला असून पुढील काही दिवस तुरळक हलक्या सरींचा अंदाज आहे. मात्र वातावरणातील आर्द्रता मोठ्या प्रमाणात वाढल्याने उष्णता आणि दमटपणा जाणवत आहे. त्यामुळे नागरिकांना घामाच्या त्रासासह उकाड्याचा सामना करावा लागत असून, दुपारच्या वेळेत बाहेर पडताना काळजी घेण्याचा सल्ला तज्ज्ञांकडून दिला जात आहे.
हवामान विभागाच्या माहितीनुसार, सध्या पावसाने काहीशी विश्रांती घेतली असली तरी दोन ते तीन दिवसांनंतर पुन्हा मान्सून सक्रिय होण्याची शक्यता आहे. त्यामुळे नागरिकांनी हवामान विभागाच्या ताज्या सूचनांकडे लक्ष ठेवून आवश्यक ती खबरदारी घ्यावी, असे आवाहन करण्यात आले आहे.
