(लोणावळा / मावळ)
पुणे जिल्ह्यातील मावळ तालुक्यातील पाटण गावावर एकामागोमाग एक संकट कोसळत आहे. विसापूर किल्ल्याचा कडा कोसळून तीन जणांचा मृत्यू झाल्याच्या दुःखातून गाव सावरत असतानाच अज्ञात चोरट्यांनी मानवतेलाच काळिमा फासणारी घटना घडवली आहे. सुरक्षिततेच्या कारणास्तव प्रशासनाने गावातील नागरिकांना तात्पुरते स्थलांतर करण्याच्या सूचना दिल्यानंतर जवळपास रिकाम्या झालेल्या गावातील तब्बल 16 घरांमध्ये घरफोडी झाल्याचे उघडकीस आले आहे.
चोरट्यांनी नियोजनबद्ध पद्धतीने बंद घरांना लक्ष्य करत कुलपे आणि दरवाजे तोडून घरात प्रवेश केला. त्यानंतर कपाटे, लॉकर आणि इतर सामानाची मोठ्या प्रमाणावर उलथापालथ करत सोन्या-चांदीचे दागिने, रोकड आणि इतर मौल्यवान वस्तूंवर हात साफ केला. काही घरांमध्ये सर्व सामान अस्ताव्यस्त फेकून दिल्याने परतलेल्या ग्रामस्थांना मोठा मानसिक धक्का बसला.
काही दिवसांपूर्वी विसापूर किल्ल्याचा कडा कोसळून झालेल्या दुर्घटनेत तीन जणांचा दुर्दैवी मृत्यू झाला होता. या घटनेनंतर संभाव्य धोका लक्षात घेऊन प्रशासनाने गावकऱ्यांना सुरक्षित ठिकाणी स्थलांतरित होण्याचे निर्देश दिले होते. अनेक कुटुंबे नातेवाईकांकडे किंवा प्रशासनाने उपलब्ध करून दिलेल्या सुरक्षित निवाऱ्यांमध्ये गेली होती. याच परिस्थितीचा गैरफायदा घेत चोरट्यांनी रिकाम्या घरांवर डल्ला मारल्याचा प्राथमिक अंदाज व्यक्त केला जात आहे.
ग्रामस्थ जेव्हा आपल्या घरी परतले, तेव्हा घरांचे दरवाजे तुटलेले, कपाटे उघडलेली आणि सर्व सामानाची नासधूस झालेली पाहून त्यांना मोठा धक्का बसला. दुर्घटनेमुळे आधीच दुःखात असलेल्या कुटुंबांवर या घरफोडीमुळे आणखी एक संकट कोसळले आहे. अनेकांनी आयुष्यभराची जमापुंजी, दागिने आणि मौल्यवान वस्तू गमावल्याने संताप आणि हतबलता व्यक्त केली आहे.
ग्रामस्थांनी प्रशासनाच्या भूमिकेवर गंभीर प्रश्न उपस्थित केले आहेत. “प्रशासनाच्या आदेशानुसार आम्ही गाव खाली केले. आमच्या जीवाचे रक्षण करण्यासाठी आम्ही घर सोडले. पण गाव रिकामे असताना किमान पोलीस बंदोबस्त ठेवणे प्रशासनाची जबाबदारी नव्हती का?” असा संतप्त सवाल ग्रामस्थांनी उपस्थित केला आहे. त्यांच्या मते, गावात दोन ते चार पोलीस कर्मचारी सतत गस्त घालत असते तर एवढ्या मोठ्या प्रमाणात घरफोड्या घडल्या नसत्या.
घटनेची माहिती मिळताच लोणावळा ग्रामीण पोलिसांनी घटनास्थळी धाव घेत पंचनामा केला. परिसरातील सीसीटीव्ही फुटेज, तांत्रिक पुरावे आणि स्थानिकांकडून माहिती संकलित करण्याचे काम सुरू असून अज्ञात चोरट्यांचा शोध घेण्यासाठी विशेष पथके नियुक्त करण्यात आली आहेत.
या धक्कादायक घटनेनंतर परिसरात भीतीचे वातावरण निर्माण झाले असून, नैसर्गिक आपत्ती किंवा आपत्कालीन परिस्थितीत रिकामे करण्यात आलेल्या गावांमध्ये पोलीस बंदोबस्त वाढवण्याची मागणी ग्रामस्थांकडून जोर धरू लागली आहे.
