(मुंबई)
मराठा समाजाला इतर मागासवर्गीय प्रवर्गातून आरक्षण मिळावे यासाठी मनोज जरांगे पाटील यांनी मुंबईतील आझाद मैदानावर उपोषण सुरु केले आहे . दरम्यान मनोज जरांगे पाटील यांचा उपोषणाचा काल चौथा दिवस होता. मराठा समाजाला ओबीसी प्रवर्गातून आरक्षण मिळावे या मागणीला आता ओबीसी नेत्यांनीही विरोध दर्शविला आहे. ओबीसी प्रवर्गात आम्हाला दुसरे वाटेकरी नकोत अशी भूमिका घेत आता ओबीसीचेही आंदोलन उभारण्याची घोषणा मंत्री छगन भुजबळ यांनी केली आहे.
दरम्यान सोमवारी ओबीसी नेते छगन भुजबळ भुजबळ यांनी राज्यातील सर्व ओबीसी नेत्यांची मुंबईत बैठक बोलविली होती. मराठा समाजाला ओबीसीतून आरक्षण देऊ नये, अशीच भूमिका सर्व ओबीसी नेत्यांची आहे. मराठा समाज आणि कुणबी एकच आहे असे म्हणणे हे चुकीचे असल्याचे कोर्टानेच म्हटले असल्याचे मंत्री छगन भुजबळ यांनी यावेळी सांगितले.
दरम्यान, छगन भुजबळांनी मुख्यमंत्र्यांची भेट घेतली, त्यांना हायकोर्ट आणि सुप्रीम कोर्टाची आरक्षणाबाबतची जजमेंट्स दाखवली. त्यांना सांगितलं की आरक्षणाची मर्यादा ओलांडली तर आम्ही दुसऱ्या दिवशी कोर्टात जाऊ. संविधानातून निर्माण झालेली ही कागदपत्रे आहेत. ही सर्वांना मान्य करावी लागतील. ते लोक काय करणार याबाबत आम्हाला काहीही कर्तव्य नाही.
आपण आता तयारीला लागा, अनेक ठिकाणी उपोषणे सुरु करायची आहेत. तहसीलदारापासून कलेक्टरपर्यंत सगळीकडे मोर्चे काढा. त्यांना आमच्या ओबीसीच्या वाट्यामध्ये दुसरे वाटेकरी नकोत ही मागणी करा असा आदेश भुजबळांनी कार्यकर्त्यांना दिला आहे.
