(रत्नागिरी/ प्रतिनिधी)
समुद्रकिनाऱ्यांच्या सौंदर्यासाठी प्रसिद्ध असलेल्या आरे-वारे परिसरात फिरण्यासाठी आलेल्या मुंबईतील एका कुटुंबावर चार अज्ञात इसमांनी हल्ला केल्याची धक्कादायक घटना शनिवारी सायंकाळी घडली. या प्रकरणी रत्नागिरी ग्रामीण पोलीस ठाण्यात गुन्हा दाखल करण्यात आला असून आरोपींचा शोध सुरू आहे.
पोलिसांकडून मिळालेल्या माहितीनुसार, प्रविण हरीचंद्र कोरे (वय ४८, रा. दहिसर पश्चिम, मुंबई) हे आपल्या कुटुंबासह पर्यटनासाठी रत्नागिरीत आले होते. २ मे रोजी सायंकाळी सुमारे पाच वाजण्याच्या सुमारास आरे-वारे येथे असताना दोन वाहनांतून आलेल्या चार अज्ञात इसमांनी त्यांच्या वाहनासमोर वाकडी-तिकडी गाडी चालवत अडथळा निर्माण केला. त्यानंतर त्यांनी कोरे कुटुंबीयांशी शिवीगाळ सुरू केली. या वर्तनाचा जाब विचारताच आरोपी अधिकच संतप्त झाले. त्यांनी प्रविण कोरे यांच्यावर हाताने मारहाण करत त्यांच्या डोक्याला, कानाला आणि हाताला दुखापत केली. या झटापटीत त्यांच्या पत्नी स्नेहल कोरे यांनाही धक्काबुक्की सहन करावी लागली. एका आरोपीने धारदार शस्त्र काढून हल्ला करण्याचा प्रयत्न केल्याचेही फिर्यादीत नमूद आहे.
या घटनेत कोरे यांचे भाऊ गिरीष यांच्या हाताला दुखापत झाली असून पुतण्या सार्थक यालाही मार लागला आहे. गोंधळाच्या परिस्थितीत कोरे यांच्या गळ्यातील सुमारे सहा ग्रॅम सोन्याची चैन तसेच त्यामधील चांदीची अंगठी हरवली असल्याची नोंद करण्यात आली आहे. यानंतर आरोपींनी कोरे यांच्या वाहनाचा काही अंतरापर्यंत पाठलाग करत जीवे मारण्याच्या धमक्या दिल्याचेही समोर आले आहे. या प्रकरणी भारतीय दंड संहिता २०२३ मधील विविध कलमांनुसार गुन्हा दाखल करण्यात आला असून पोलिसांकडून आरोपींचा शोध घेण्यासाठी पथके रवाना करण्यात आली आहेत. पर्यटकांवर झालेल्या या प्रकारामुळे परिसरात चिंतेचे वातावरण निर्माण झाले आहे.
कोकणातील निसर्गसौंदर्य, शांत वातावरण आणि सुरक्षिततेची प्रतिमा यामुळे दरवर्षी मोठ्या संख्येने पर्यटक रत्नागिरीत दाखल होत असतात; मात्र अशा प्रकारच्या घटनांमुळे पर्यटकांच्या मनात भीतीची भावना निर्माण होण्याची शक्यता आहे. आरे-वारेसारख्या पर्यटनस्थळी घडलेला हा प्रकार केवळ एका कुटुंबापुरता मर्यादित नसून संपूर्ण पर्यटन व्यवस्थेवर प्रश्नचिन्ह निर्माण करणारा ठरू शकतो. आतापर्यंत रत्नागिरी जिल्हा पर्यटकांसाठी सुरक्षित ठिकाण म्हणून ओळखला जात होता; स्थानिकांकडून आदरातिथ्याची परंपरा जपली जात होती. त्यामुळे अशा दादागिरीच्या घटना अपवादात्मक मानल्या जात होत्या. पर्यटकांवर हल्ला, शिवीगाळ किंवा लूटमार यांसारखे प्रकार घडल्यास जिल्ह्याच्या सकारात्मक प्रतिमेला धक्का बसण्याची भीती व्यक्त केली जात आहे. पर्यटन हा कोकणाच्या अर्थव्यवस्थेचा महत्त्वाचा आधारस्तंभ असल्याने अशा घटनांचा थेट परिणाम स्थानिक व्यवसाय, हॉटेल्स, मार्गदर्शक आणि अन्य सेवा क्षेत्रांवर होऊ शकतो. यापुढे अशा घटना टाळण्यासाठी पर्यटनस्थळी पोलीस बंदोबस्त वाढवणे, गस्त कडक करणे आणि सीसीटीव्ही यंत्रणा प्रभावी करणे गरजेचे ठरत आहे.
