(छत्रपती संभाजीनगर)
स्थानिक स्वराज्य संस्थांच्या निवडणुका अंतिम टप्प्यात पोहोचल्या असून, दोन्ही महायुती आणि महाविकास आघाडीचे नेते, पदाधिकारी व कार्यकर्ते उमेदवारांच्या प्रचारात गुंतले आहेत. याच पार्श्वभूमीवर भाजप उमेदवारांच्या प्रचारासाठी मुख्यमंत्री देवेंद्र फडणवीस यांनी छत्रपती संभाजीनगर दौरा केला. या भेटीत त्यांनी माध्यमांशी संवाद साधत महत्त्वाचे आश्वासन दिले.
“महिलांसाठी सुरू असलेली ‘लाडकी बहीण योजना’ बंद करण्याचा सरकारचा कोणताही विचार नाही. तसेच शेतकऱ्यांसाठीची मोफत वीज योजना देखील सुरूच राहील. राज्यातील सौर प्रकल्प पूर्ण क्षमतेने सुरू झाल्यानंतर शेतकऱ्यांना अखंड 24 तास वीज मिळेल,” असे मुख्यमंत्री फडणवीस म्हणाले.
काही विरोधकांद्वारे पसरवल्या जाणाऱ्या अफवांचा उल्लेख करताना ते म्हणाले, “भाजपाला मिळालेल्या लोकप्रिय जनादेशानंतर सरकार या योजना बंद करेल, असा खोटा प्रचार काही जण करत आहेत. पण ‘लाडकी बहीण’ योजना गेल्या वर्षभरापासून सुरू आहे आणि मी मुख्यमंत्री असेपर्यंत ती बंद होणार नाही. आमच्या बहिणींना अधिक रोजगार देऊन त्यांना ‘लखपती दीदी’ बनवण्याचा आमचा संकल्प आहे.”
नगरपरिषद निवडणुकांतील जनादेशाबाबत बोलताना त्यांनी सांगितले, “केंद्र आणि राज्य सरकार पंतप्रधान नरेंद्र मोदी यांच्या नेतृत्वाखाली कार्यरत आहे. येत्या निवडणुकीत मतदारांनी आम्हाला अनुकूल कौल दिल्यास, शासनाच्या योजनांचा लाभ अधिक प्रभावीपणे लोकांपर्यंत पोहोचवता येईल.”
शहरीकरणाच्या बदलत्या स्वरूपाचा उल्लेख करताना ते म्हणाले, “पूर्वी शहरीकरणाला शाप मानले जात होते. परंतु 2014 नंतर आम्ही रोजगारनिर्मिती आणि औद्योगिक विकासाची मोठी संधी म्हणून त्याकडे पाहत आहोत. पंतप्रधान मोदींच्या मार्गदर्शनाखाली राबविलेल्या योजनांमुळे महाराष्ट्राला मोठ्या प्रमाणात निधी मिळाला असून त्यातून शहरांचा चेहरामोहरा बदलत आहे.”
