(रत्नागिरी)
मुंबई विद्यापीठ आंतरमहाविद्यालयीन बॅडमिंटन स्पर्धा – २०२५ मध्ये कोंकण विभाग क्रमांक-४ने उल्लेखनीय कामगिरी करत इतिहास रचला आहे. रत्नागिरी येथील गोगटे-जोगळेकर महाविद्यालय (स्वायत्त) हिच्या कु. श्रुति फणसे हिच्या नेतृत्वाखालील कोंकण विभाग महिला बॅडमिंटन संघाने प्रथमच या स्पर्धेत रौप्य पदक पटकावत सांघिक उपविजेतेपदाचा मान मिळवला.
दि. १५ ते १६ ऑक्टोबर २०२५ दरम्यान मुंबई विद्यापीठ आणि जोशी-बेडेकर महाविद्यालय, ठाणे यांच्या संयुक्त विद्यमाने महिला बॅडमिंटन स्पर्धेचे आयोजन दादोजी कोंडदेव क्रीडा संकुल, ठाणे येथे करण्यात आले होते. या स्पर्धेत कोंकण विभाग महिला बॅडमिंटन संघात गोगटे-जोगळेकर महाविद्यालय (स्वायत्त), रत्नागिरीची कु. श्रुति फणसे, संत राऊळ महाराज महाविद्यालय, कुडाळची कु. श्रेया श्रीकांत सामंत, बी. के. वेंगुर्ला महाविद्यालय, वेंगुर्लाची कु. सभा अब्दुलकरीम शेख तसेच डी. बी. जे. महाविद्यालय, चिपळूण येथील कु. सेजल सुनील कदम आणि कु. महेनूर रफिक खान यांचा समावेश होता.
या विद्यार्थिनींची निवड कोंकण विभाग महिला बॅडमिंटन संघाकरिता करण्यात आली होती. संघाला क्रीडा संचालक डॉ. विनोद शिंदे, क्रीडा शिक्षक प्रा. क्रिस्टन सॅबेस्टियन रॉड्रिक्स, प्रा. कल्पेश बोटके तसेच माधव फणसे यांचे मोलाचे मार्गदर्शन लाभले.
मुंबई विद्यापीठ आंतरमहाविद्यालयीन महिला बॅडमिंटन स्पर्धा २०२५ मधील या ऐतिहासिक यशाबद्दल कोंकण विभाग क्रमांक-४ महिला बॅडमिंटन संघाचे र. ए. सोसायटीच्या कार्याध्यक्षा श्रीम. शिल्पा पटवर्धन, कार्यवाह श्री. सतीश शेवडे, जिमखाना समितीचे अध्यक्ष डॉ. चंद्रशेखर केळकर, संस्थेचे सन्माननीय सदस्य, कोंकण विभाग समितीचे पदाधिकारी तसेच गोगटे-जोगळेकर महाविद्यालयाचे प्राचार्य डॉ. मकरंद साखळकर, तीनही शाखांचे उपप्राचार्य, जिमखाना समितीचे उपाध्यक्ष डॉ. विवेक भिडे, सर्व प्राध्यापक, कर्मचारी व सेवक यांनी मनःपूर्वक अभिनंदन करून संघाच्या पुढील स्पर्धांसाठी शुभेच्छा दिल्या.
