(गडचिरोली)
शासकीय जबाबदाऱ्या पार पाडताना गंभीर बेजबाबदारीचे वर्तन करणाऱ्या एका अधिकाऱ्याच्या विरोधात अखेर निलंबनाची कारवाई करण्यात आली आहे. गडचिरोली जिल्ह्यातील सार्वजनिक बांधकाम विभागाचे चामोर्शी येथील उपविभागीय अभियंता देवानंद सोनटक्के हे नागपूरमधील एका बारमध्ये दारूच्या नशेत शासकीय दस्तऐवजांवर सही करत असल्याचा व्हिडीओ सोशल मीडियावर व्हायरल झाला होता.
हा व्हिडीओ समोर आल्यानंतर शासनाने तत्काळ दखल घेत शिस्तभंगाची कारवाई करण्याचे आदेश दिले. चौकशीदरम्यान देवानंद सोनटक्के हे सध्या चामोर्शी येथे कार्यरत असल्याचे स्पष्ट झाले. त्यानंतर सार्वजनिक बांधकाम विभागाच्या वतीने त्यांच्यावर निलंबनाची कारवाई करण्यात आली असून, यासंबंधीचे आदेश शासनाकडून गडचिरोलीच्या संबंधित विभागाला प्राप्त झाले आहेत.
व्हिडीओतील दृश्यांमध्ये सोनटक्के नागपूरमधील कीर्ती बार आणि रेस्टॉरंटमध्ये बसून शासकीय फाईल्सवर काम करत असल्याचे दिसून आले. सीसीटीव्ही फुटेजमध्येही हे सर्व दृश्यमान असून, त्यामधील दस्तऐवज सार्वजनिक बांधकाम विभागाचे असल्याचे पुष्टी झाली आहे. हे प्रकरण उघडकीस आल्यानंतर प्रशासनात मोठी खळबळ उडाली आहे. राज्याचे महसूल मंत्री आणि गडचिरोलीचे पालकमंत्री चंद्रशेखर बावनकुळे यांनी या प्रकाराची सखोल चौकशी करण्याचे आदेश दिले आहेत. सध्या संबंधित प्रकरणाची चौकशी सुरू असून, दोषी अधिकाऱ्यावर पुढील कठोर कारवाई होण्याची शक्यता आहे.
