(जैतापूर / वार्ताहर)
महाराष्ट्र शासनाच्या वन विभागाच्या कांदळवन कक्षामार्फत पर्यावरणपूरक व रोजगाराभिमुख योजनांची माहिती देण्यासाठी जैतापूर ग्रामपंचायतीत महिला बचत गटांसाठी विशेष मार्गदर्शन शिबिराचे आयोजन करण्यात आले होते.
या शिबिरात कांदळवन कक्षातील प्रिया कांबळे यांनी उपस्थित महिलांना शिंदाणे पालन, खेकडे पालन, कालवे निर्मिती, शोभिवंत मासे निर्मिती आणि मूल्यवर्धित मत्स्यपदार्थ निर्मिती अशा विविध उपक्रमांची सखोल माहिती दिली. या योजनांसाठी शासनामार्फत ९० टक्क्यांपर्यंत अनुदान मिळू शकते, हेही त्यांनी स्पष्ट केले.
शिबिरात महिलांना स्वयंरोजगाराच्या संधी, प्रशिक्षण प्रक्रियेबरोबरच अर्ज कसा करावा, कोणती कागदपत्रे आवश्यक आहेत याविषयीही सविस्तर माहिती देण्यात आली. यावेळी उपस्थित महिलांनी योजनांबाबत उत्स्फूर्त सहभाग नोंदवत प्रत्यक्ष प्रकल्प राबवण्याची तयारी दर्शवली.
व्यासपीठावर जैतापूर ग्रामपंचायतीचे सरपंच राजप्रसाद राऊत, ग्रामसेवक गराटे आणि त्रिवेणी लोकसंचलित केंद्राचे व्यवस्थापक राजन लाड आदी मान्यवर उपस्थित होते. त्यांनी महिलांना शासनाच्या योजनांचा लाभ घेण्याचे आवाहन करत प्रोत्साहन दिले.
या उपक्रमाच्या माध्यमातून स्थानिक महिला बचत गटांसाठी पर्यावरणसंवर्धनासोबतच उत्पन्नवाढीचे नवीन मार्ग खुले झाले असून, या योजनांची प्रभावी अंमलबजावणी होण्यासाठी पुढील पावले उचलली जात आहेत.
