(मुंबई)
वांद्रे पूर्वेतील भारत नगर परिसरात आज (शुक्रवारी) सकाळी एक मोठी दुर्घटना घडली. नमाज कमिटी मशिदीजवळील एक तीन मजली चाळ अचानक कोसळल्याने परिसरात एकच खळबळ उडाली. या घटनेत सुमारे सात जण जखमी झाले असून, अनेकजण ढिगाऱ्याखाली अडकले असण्याची भीती व्यक्त करण्यात येत आहे.
ही दुर्घटना सकाळी साडेसातच्या सुमारास, म्हणजे ७ वाजून ५० मिनिटांनी घडली. प्राथमिक माहितीनुसार, चाळीतील एका घरात सिलेंडरचा स्फोट झाला आणि त्यानंतर इमारतीचा काही भाग कोसळला, असे मुंबई पोलिसांनी सांगितले. घटनास्थळी अग्निशमन दल, मुंबई पोलीस आणि महापालिकेचे आपत्कालीन पथक तत्काळ दाखल झाले असून बचावकार्य युद्धपातळीवर सुरू आहे.
सध्या ढिगाऱ्याखालून १२ जणांना बाहेर काढण्यात आले असून, त्यांना तातडीने मुंबई महापालिकेच्या भाभा रुग्णालयात दाखल करण्यात आले आहे. जखमींच्यावर उपचार सुरू आहेत. दरम्यान, इतर अडकलेल्यांचा शोध घेण्यासाठी मदत कार्य सुरूच आहे.
