(मुंबई)
माहिती व जनसंपर्क विभागातील वरिष्ठ सहाय्यक संचालक आणि उपमुख्यमंत्री अजित पवार यांचे जनसंपर्क अधिकारी संजय देशमुख (वय ५५) यांचे शनिवारी (दि. १२) हृदयविकाराच्या तीव्र झटक्याने निधन झाले. त्यांच्या निधनाने पत्रकारिता व शासकीय जनसंपर्क क्षेत्रातील एक संयमी, संवेदनशील आणि अभ्यासू व्यक्तिमत्त्व हरपले आहे.
विशेष म्हणजे पावसाळी अधिवेशनाच्या कार्यकाळात गेल्याच आठवड्यात ते विधिमंडळात (assembly) सक्रीयपणे सहभागी होते. या काळात अनेक नेत्यांच्या व पत्रकारांच्या त्यांच्याशी गाठीभेटीही झाल्या आहेत. त्यामुळे, अनेकांना त्यांच्या निधनाच्या वृत्ताने धक्का बसला आहे. दरम्यान, अजित पवारांनीही ट्विट करुन श्रद्धांजली अर्पण केली आहे.
संजय देशमुख हे गेल्या दहा वर्षांहून अधिक काळ उपमुख्यमंत्री अजित पवार यांच्याकडे जनसंपर्क अधिकारी म्हणून कार्यरत होते. संयमित स्वभाव, प्रभावी संवादशैली आणि कुशल व्यवस्थापनामुळे त्यांनी प्रशासन आणि प्रसारमाध्यमांमध्ये महत्त्वाचा दुवा म्हणून भूमिका बजावली. त्यांनी आपल्या पत्रकारितेच्या कारकिर्दीची सुरुवात ‘मुंबई दिनांक’ आणि ‘दैनिक सकाळ’ या माध्यमांतून केली. माध्यम क्षेत्रातील अनुभवामुळे त्यांच्या शासकीय कामकाजात व्यावसायिकता, स्पष्टता आणि सुसूत्रता दिसून आली.
त्यांचे पार्थिव अंत्यदर्शनासाठी सोमवार सकाळी 07 ते 08 या वेळेत वरळी पोलीस स्टेशनशेजारील ‘दर्शना’ या शासकीय निवासस्थानी ठेवण्यात येईल, त्यानंतर सकाळी 08.30 वाजता दादर येथील स्मशानभूमीत त्यांच्या पार्थिवावर अंत्यसंस्कार करण्यात येणार आहेत. त्यांच्या पश्चात आई-वडील, पत्नी आणि मुलगी असा परिवार आहे.
