(कोयनानगर)
कोयना धरणाच्या पाणलोट क्षेत्रात गेल्या काही दिवसांपासून पावसाचा जोर कमी झाल्यामुळे धरणात येणाऱ्या पाण्याच्या आवकेतही घट झाली आहे. परिणामी, सध्या धरणात 71.40 टीएमसी इतका पाणीसाठा असून, तो एकूण क्षमतेच्या सुमारे 67.84 टक्के आहे. हवामान खात्याने यासाठी ‘ग्रीन अलर्ट’ म्हणजेच सर्वसाधारण पावसाचा इशारा दिला आहे. या पार्श्वभूमीवर धरणाचे दरवाजे उघडण्याचा निर्णय कोयना प्रकल्प प्रशासनाने पुढील २४ तासांसाठी लांबणीवर टाकला आहे.
धरणात दररोज सुमारे 12,389 क्यूसेक (1.07 टीएमसी) पाण्याची आवक होत असून, पाणलोट क्षेत्रात बुधवारपर्यंत कोयना येथे 12 मिमी, नवजा येथे 7 मिमी आणि महाबळेश्वर येथे 13 मिमी पावसाची नोंद झाली आहे. ही आकडेवारी जूनपासून सुरू असलेल्या सरासरी पावसाच्या तुलनेत कमी असल्याने धरणात पाण्याचा साठा अपेक्षेप्रमाणे वाढत नाही. कोयना प्रकल्पाच्या नियमानुसार, पाणीसाठा ‘क्रश लेव्हल’वर पोहोचल्यावरच दरवाजे उघडण्याचा निर्णय घेतला जातो. सध्या ही स्थिती नसल्यामुळे दरवाजे बंद ठेवण्याचा निर्णय प्रशासनाने घेतला आहे.
प्रकल्पाचे अधीक्षक अभियंता अभय काटकर यांनी दिलेल्या माहितीनुसार, धरण परिचालन सूचीच्या मार्गदर्शक सूचनांनुसार जलपातळीचे बारकाईने निरीक्षण सुरू आहे. जर पुढील ४८ तासांत पाण्याचा साठा ‘क्रश लेव्हल’वर पोहोचला, तर दरवाजे उघडण्याचा निर्णय घ्यावा लागेल. याआधी नदीकाठच्या गावांना सतर्कतेचा इशारा दिला जाईल आणि सर्व प्रशासकीय यंत्रणा कार्यान्वित केली जाईल, असेही त्यांनी स्पष्ट केले.
दरवाजे उघडण्यास विलंब झाला असला तरी प्रशासन सतत परिस्थितीवर लक्ष ठेवून आहे. पावसाचे प्रमाण आणि धरणात येणाऱ्या पाण्याची वेगाने होत असलेली नोंद पाहता, जलपातळी सध्या नियंत्रणात आहे. दरवाजे उघडण्याची गरज निर्माण झाल्यास त्याबाबत योग्य वेळी निर्णय घेण्यात येईल आणि स्थानिक प्रशासनासह नागरिकांनाही आवश्यक सूचना दिल्या जातील.
