( चिपळूण )
डॉ. बाळासाहेब सावंत कोकण कृषी विद्यापीठ, दापोली यांचे नवनिर्वाचित कुलसचिव डॉ. संतोष सावर्डेकर यांनी गोविंदरावजी निकम कृषी महाविद्यालय आणि जिजामाता महिला कृषी महाविद्यालय, मांडकी-पालवण येथे नुकतीच सदिच्छा भेट दिली. कुलसचिवपदी निवडीनंतरची ही त्यांची पहिलीच अधिकृत भेट होती.
यावेळी आपल्या मनोगतात डॉ. सावर्डेकर म्हणाले, “या महत्त्वाच्या पदापर्यंत पोहोचण्यामागे माननीय डॉ. तानाजीराव चोरगे सर यांचे मोलाचे मार्गदर्शन आणि पाठबळ हेच मुख्य कारण ठरले. त्यांच्या प्रेरणेनेच माझ्या वाटचालीला दिशा मिळाली.” त्यांनी विद्यापीठाच्या माध्यमातून दोन्ही महाविद्यालयांच्या सर्वांगीण प्रगतीसाठी सदैव कटिबद्ध राहण्याचे आश्वासन दिले.
कार्यक्रमावेळी गोविंदरावजी निकम कृषी महाविद्यालयाचे प्राचार्य डॉ. एस. एस. कदम यांनी कुलसचिव डॉ. सावर्डेकर यांचे स्वागत व सत्कार केला आणि त्यांना नवीन जबाबदारीसाठी शुभेच्छा दिल्या. या प्रसंगी संस्थेचे अध्यक्ष कृषिभूषण डॉ. तानाजीराव चोरगे, उपाध्यक्ष निखिल चोरगे, जिजामाता महिला कृषी महाविद्यालयाच्या प्राचार्य डॉ. एस. एन. चोरगे, तसेच इतर प्राध्यापकवर्ग आणि कर्मचाऱ्यांची उपस्थिती होती.
