(रत्नागिरी / प्रतिनिधी)
जिल्ह्यातील संगमेश्वर तालुक्यातील देवरुख ग्रामीण रुग्णालयात करण्यात आलेल्या बांधकामातील हलगर्जीपणा आता उघड झाला असून, भिंतीवर लावलेल्या लाद्या एकामागून एक कोसळत आहेत. या धोकादायक स्थितीतून नागरिक व रुग्ण थोडक्यात बचावत असून, रुग्णालयाच्या सुरक्षिततेवर मोठे प्रश्नचिन्ह निर्माण झाले आहे.
विशेष म्हणजे हे बांधकाम झालेला कालावधी एक वर्ष पूर्णही झाला नाही, तरीदेखील भिंतींवरील लाद्या गळून पडू लागल्या आहेत. कामाच्या निकृष्ट दर्जाची ही स्पष्ट साक्ष असून, यामुळे रुग्णालयातील आरोग्य सेवा धोक्यात आली आहे. या बांधकामासाठी अंदाजे सुमारे ११ कोटी रुपये खर्च करण्यात आल्याची माहिती मिळत असून, हे काम निर्माण इन्फ्रास्ट्रक्चर या कंपनीमार्फत पार पडले आहे. इतक्या मोठ्या खर्चानंतरही कामात गंभीर त्रुटी राहिल्याचे आता स्पष्ट होत आहे. या लापरवाहीमुळे उद्भवणाऱ्या अपघातास जबाबदार कोण? हा प्रश्न सध्या अनुत्तरित आहे.
रुग्णालयासारख्या अत्यावश्यक सेवेसाठी वापरण्यात येणाऱ्या इमारतीत असे अपयश हे अत्यंत गंभीर बाब आहे. या प्रकरणाची सखोल चौकशी करून ठेकेदारावर कठोर कारवाई करण्यात यावी, अशी मागणी केली जात आहे. या कामास मंजुरी देणाऱ्या आणि देखरेख करणाऱ्या सरकारी यंत्रणांची भूमिकाही संशयाच्या भोवऱ्यात आली आहे. जर बांधकाम सुरू असताना योग्य प्रमाणात तपासणी झाली असती, तर आज ही वेळ आली नसती. त्यामुळे प्रशासकीय दुर्लक्ष आणि ठेकेदाराचा हलगर्जीपणा दोन्ही बाबींची सखोल चौकशी होणे अत्यावश्यक आहे. सध्या परिस्थिती पाहता, या बांधकामाची गुणवत्ता तपासण्यासाठी स्वतंत्र तांत्रिक समितीची गरज आहे. अशी समिती कामाचे नमुने, साहित्याची गुणवत्ता आणि यंत्रणांच्या कामकाजाची चौकशी करू शकते. मात्र यासंदर्भात प्रशासन कठोर पावले उचलणार का? असा सवाल उपस्थित होत आहे.
सरकारी निधीतून जनतेच्या सेवेसाठी उभ्या राहिलेल्या रुग्णालयाच्या बांधकामात अशा प्रकारच्या निष्काळजीपणामुळे भविष्यात मोठा अपघात होऊ शकतो. तरीसुद्धा प्रशासनाचे मौन आणि दुर्लक्ष ही गोष्ट लोकशाहीतील उत्तरदायित्वाच्या मूळ तत्वांना बाधा पोहोचवणारी आहे. निकृष्ट बांधकामांबाबत केवळ चौकशी जाहीर करून नव्हे, तर ठेकेदार कंपनीवर कडक कारवाई करूनच प्रशासन लोकांचा विश्वास पुन्हा मिळवू शकते. अन्यथा असे अपयश हे केवळ आर्थिक नुकसानच नव्हे, तर माणसांचे प्राणही घेऊ शकते.
