(राजापूर)
तालुक्यातील सौंदळ रेल्वे स्थानकाच्या परिसरात, बारेवाडी बोगद्याजवळ एका अज्ञात पुरुषाचा मृतदेह आढळून आला आहे. प्राथमिक माहितीनुसार, सदर व्यक्तीचे वय अंदाजे ४० वर्षे असून, रेल्वेच्या धडकेत त्याचा मृत्यू झाला असावा, असा अंदाज पोलिसांनी व्यक्त केला आहे.
घटनास्थळी पोलिसांनी धाव घेत मृतदेह ताब्यात घेतला असून, ओळख पटविण्याचे प्रयत्न सुरू आहेत. याप्रकरणी राजापूर पोलीस ठाण्यात आकस्मिक मृत्यूची नोंद करण्यात आली आहे. मृत्यूचे नेमके कारण आणि परिस्थिती स्पष्ट होण्यासाठी पुढील तपास सुरू आहे.
सदर घटना १९ एप्रिल २०२५ रोजी सकाळी १०.३० वाजण्याच्या सुमारास उघडकीस आली. सौंदळ रेल्वे स्टेशनच्या हद्दीतील मैल दगड क्रमांक २५८/१ ते २५८/२ च्या दरम्यान बारेवाडी बोगद्याजवळ हा मृतदेह आढळला. याबाबतची माहिती राजापूर पोलिसांना दुपारी ४.२० वाजता देण्यात आली. पोलिसांनी घटनास्थळी धाव घेऊन पाहणी केली आणि अज्ञात व्यक्ती म्हणून आकस्मिक मृत्यूची नोंद (आमृ. क्रमांक २३/२०२५, बी.एन.एस.एस. १९४ प्रमाणे) केली आहे. मृतदेहाची ओळख पटवण्याचे आणि पुढील तपास करण्याचे काम राजापूर पोलीस करत आहेत.
सदर घटना दुर्दैवी असून, नागरिकांनी अपघातप्रवण रेल्वेमार्गांपासून सुरक्षित अंतर राखण्याचे आवाहन प्रशासनाने केले आहे.
