जगातील सर्वाधिक प्रभावशाली मुस्लिम व्यक्तींची नावे जाहीर करणाऱ्या ‘द मुस्लिम ५००’ या प्रतिष्ठित यादीत यंदा भारतातील २२ व्यक्तींनी स्थान मिळवले आहे. धार्मिक, राजकीय, सामाजिक, उद्योग आणि मनोरंजन क्षेत्रातील मान्यवरांचा या यादीत समावेश असून, बॉलिवूडचा सुपरस्टार शाहरुख खान याचे नाव पहिल्यांदाच या यादीत झळकले आहे. विशेष म्हणजे, भारतातील व्यक्तींमध्ये जमियत उलेमा-ए-हिंदचे अध्यक्ष मौलाना महमूद मदानी यांनी सर्वाधिक प्रभावशाली भारतीय मुस्लिम म्हणून स्थान मिळवले असून, जागतिक क्रमवारीत ते १८व्या क्रमांकावर आहेत.
‘द मुस्लिम ५००’च्या पहिल्या ५० प्रभावशाली व्यक्तींमध्ये स्थान मिळवणारे मौलाना महमूद मदानी हे एकमेव भारतीय ठरले आहेत. मनोरंजन क्षेत्रातून शाहरुख खान, आमिर खान, अभिनेत्री शबाना आझमी आणि प्रसिद्ध संगीतकार ए. आर. रहमान यांची नावे या यादीत समाविष्ट आहेत. अधिकृत यादीत शाहरुख खानच्या नावासमोर ‘New’ असा उल्लेख करण्यात आला आहे. त्यामुळे यंदा प्रथमच त्याचा या जागतिक यादीत समावेश झाल्याचे स्पष्ट होते.
राजकीय आणि व्यावसायिक क्षेत्रातील भारतीय व्यक्तींनाही या यादीत स्थान देण्यात आले आहे. राजकारणातून असदुद्दीन ओवैसी आणि बद्रुद्दीन अजमल यांचा, तर उद्योग क्षेत्रातून अझीम प्रेमजी यांचा समावेश आहे. विज्ञान क्षेत्राचे प्रतिनिधित्व डॉ. हसिमा हसन करत आहेत.
धार्मिक आणि शैक्षणिक क्षेत्रातील अनेक भारतीय व्यक्तींचीही या यादीत नोंद आहे. केरळमधील इस्लामिक शिक्षण क्षेत्रातील महत्त्वाचे व्यक्तिमत्त्व असलेले डॉ. बहाउद्दीन मुहम्मद जमालुद्दीन नदवी हे दारुल हुदा इस्लामिक युनिव्हर्सिटीशी संबंधित नेतृत्व आणि शैक्षणिक कार्यासाठी ओळखले जातात. ज्येष्ठ इस्लामिक विद्वान आणि धार्मिक मार्गदर्शक मौलाना कमरुज्जमां आझमी यांचा वर्ल्ड इस्लामिक मिशनशी संबंधित कार्यासाठी परिचय आहे.
शेख अबूबक्र अहमद हे भारतातील ज्येष्ठ इस्लामिक विद्वान असून, ते कांतपुरम ए. पी. अबूबक्र मुसलियार या नावानेही परिचित आहेत. समस्त केरळ जमीयतुल उलेमाचे प्रमुख म्हणून ते धार्मिक शिक्षण क्षेत्रातील महत्त्वाचे व्यक्तिमत्त्व मानले जातात. याशिवाय लेखिका आणि बालसाहित्य निर्मात्या डॉ. सानियासनैन खान यांचाही यादीत समावेश आहे. इस्लामिक इतिहास, धार्मिक कथा आणि मुलांसाठी शैक्षणिक पुस्तकांचे लेखन हे त्यांच्या कार्याचे वैशिष्ट्य आहे.
‘द वर्ल्ड्स ५०० मोस्ट इन्फ्लुएन्शियल मुस्लिम’ ही जागतिक स्तरावरील प्रभावशाली मुस्लिम व्यक्तींची वार्षिक यादी जॉर्डनमधील ‘रॉयल इस्लामिक स्ट्रॅटेजिक स्टडीज सेंटर’ या संस्थेकडून प्रकाशित केली जाते. २००९ मध्ये या उपक्रमाची सुरुवात झाली असून, २०२७ हे या यादीचे १८ वे वार्षिक वर्ष आहे. यंदाच्या अहवालात ८२ देशांतील एकूण ५०९ व्यक्तींचा समावेश करण्यात आला आहे. त्यात २९ नवीन नावांना स्थान देण्यात आले आहे.
दरम्यान, यंदाच्या जागतिक क्रमवारीत पाकिस्तानचे पंतप्रधान शाहबाज शरीफ आणि लष्करप्रमुख फील्ड मार्शल आसिम मुनीर यांना अव्वल स्थान मिळाले आहे. सौदी अरेबियाचे राजे सलमान, युवराज मोहम्मद बिन सलमान आणि तुर्कस्तानचे राष्ट्राध्यक्ष रेसेप तय्यिप एर्दोगान यांच्यासोबत त्यांनी संयुक्तपणे पहिले स्थान पटकावले आहे. त्यामुळे यंदाच्या ‘द मुस्लिम ५००’ यादीत भारतीय मान्यवरांसह आंतरराष्ट्रीय स्तरावरील राजकीय आणि धार्मिक नेतृत्वाचीही विशेष नोंद झाली आहे.


