(रत्नागिरी /प्रतिनिधी)
निसर्गरम्य आरेवारे बीचच्या निळ्याशार समुद्रावरून हवेत विहार करण्याचा ‘साहसी’ मोह एका तरुण जोडप्याला चांगलाच महागात पडता-पडता राहिला. पर्यटकांना ‘थरार’ अनुभवता यावा म्हणून सुरू केलेली झिपलाईन चक्क समुद्राच्या मध्यभागीच ‘विसावली’ आणि या जोडप्याचा जीव अक्षरशः टांगणीला लागला. खाली अथांग समुद्र, वर आभाळ आणि मधोमध दोरीवर अडकलेले हे प्रेमीयुगुल पाहून किनाऱ्यावरील पर्यटकांच्याही काळजाचा ठोका चुकला. अखेरीस दुसऱ्या दोरीच्या सहाय्याने ‘रेस्क्यू ऑपरेशन’ राबवत या दोघांना सुखरूप खाली खेचल्यानंतर सर्वांचाच जीव भांड्यात पडला.
आरेवारे येथील उंच कड्यावरून थेट बीचच्या दिशेने झेपावणारी झिपलाईन सध्या पर्यटकांचे मुख्य आकर्षण ठरली आहे. सेफ्टी हार्नेस लावून सुसाट वेगाने समुद्रावरून घसरण्याचा आनंद घेण्यासाठी येथे रोजच पर्यटकांची झुंबड उडते. आज सायंकाळी नेहमीप्रमाणेच उत्साहाचे वातावरण होते. एका तरुण जोडप्याने मोठ्या हिरिरीने झिपलाईनवरून उडी घेतली. सुरुवातीचा वेग पाहता प्रवास सुखकर होईल असेच वाटत होते; मात्र, नेमके समुद्राच्या मध्यभागी येताच तांत्रिक बिघाडाने किंवा वाऱ्याच्या लहरीपणाने या झिपलाईनला ‘ब्रेक’ लावला आणि दोघेही हवेतच लटकून राहिले.
नेहमी रोमान्स आणि थरार देणारा समुद्र यावेळी मात्र या जोडप्यासाठी धडकी भरवणारा ठरला. खाली खवळलेल्या लाटांचा आवाज आणि वर अडकलेला जीव, अशा विचित्र कात्रीत हे जोडपे सापडले. हवेत लटकलेल्या या दोघांची तारांबळ पाहून किनाऱ्यावरील पर्यटकांमध्ये एकच खळबळ उडाली. ‘थरार’ अनुभवायला आलेल्या पर्यटकांना समोर ‘लाइव्ह थ्रिलर’ पाहायला मिळाला.
दोरीच्या सहाय्याने सुटका
घटनेचे गांभीर्य ओळखून झिपलाईन चालकांनी तातडीने सूत्रे हलवली. कोणत्याही आधुनिक यंत्रणेपेक्षा पारंपारिक ‘दोरीचा’ आधार घेत कर्मचाऱ्यांनी आणि स्थानिकांनी शर्थीचे प्रयत्न सुरू केले. दुसऱ्या एका मजबूत रस्सीच्या मदतीने अडकलेल्या जोडप्यापर्यंत पोहोचून त्यांना अत्यंत कौशल्याने किनाऱ्यावर ओढून आणण्यात आले. सुदैवाने या ‘हवाई कसरतीत’ कोणालाही दुखापत झाली नाही. मात्र, या निमित्ताने साहसी खेळांच्या सुरक्षिततेचा आणि तांत्रिक देखभालीचा मुद्दा पुन्हा एकदा ऐरणीवर आला आहे. ‘हवेत उडताना जमिनीवरचे भान आणि यंत्रणेची तपासणी गरजेची असते,’ असाच जणू धडा या घटनेने दिला आहे.
