(संगमेश्वर / एजाज पटेल)
मुलाच्या निधनानंतर पत्नीचेही निधन झाल्याने निर्माण झालेला एकाकीपणा आणि मानसिक तणाव सहन न झाल्याने संगमेश्वर तालुक्यातील लोबले फटकरेवाडी येथील ७५ वर्षीय वृद्धाने राहत्या घरी गळफास घेऊन आत्महत्या केल्याची दुर्दैवी घटना ५ नोव्हेंबर रोजी उघडकीस आली. अनंत यशवंत फटकरे असे मृत वृद्धाचे नाव असून, त्यांच्या निधनाने परिसरात हळहळ व्यक्त होत आहे.
अनंत फटकरे यांच्या आयुष्यात गेल्या काही वर्षांत दुःखद घटनांची मालिका सुरू होती. दीड वर्षापूर्वी त्यांच्या मुलाचे अचानक निधन झाले, तर त्यानंतर वर्षभरापूर्वी पत्नीचेही निधन झाले. आयुष्याच्या उत्तरार्धात मुलगा आणि पत्नी या दोघांचीही साथ सुटल्याने ते एकाकी जीवन जगत होते. कुटुंबातील या दोन महत्त्वाच्या व्यक्तींच्या निधनाचा त्यांना मोठा मानसिक धक्का बसला होता. त्यांच्या मनावर या दुःखाचा खोल परिणाम झाला होता.
५ नोव्हेंबर रोजी सकाळी ११.३० ते सायंकाळी ४.४५ या कालावधीत त्यांनी लोबले फटकरेवाडी येथील आपल्या राहत्या घरी गळफास घेतल्याची घटना घडली. हा प्रकार निदर्शनास आल्यानंतर पोलिसांना याची माहिती देण्यात आली. या प्रकरणी त्यांची मुलगी सौ. क्षमा अमित कळंबटे यांनी दिलेल्या माहितीनुसार संगमेश्वर पोलीस ठाण्यात आकस्मिक नोंद करण्यात आली आहे.
मुलगा आणि पत्नीच्या निधनानंतर आलेल्या एकाकीपणामुळे एका ज्येष्ठ नागरिकाचा दुर्दैवी अंत झाल्याने फटकरेवाडी परिसरात शोक व्यक्त केला जात आहे. या घटनेमुळे वृद्धापकाळात ज्येष्ठ नागरिकांना कुटुंबीयांचा सहवास, भावनिक आधार आणि मानसिक स्वास्थ्याची काळजी मिळणे किती महत्त्वाचे आहे, हे पुन्हा अधोरेखित झाले आहे. आयुष्याच्या संध्याकाळी आधाराची गरज असलेल्या अनंत फटकरे यांच्या निधनाने परिसरात हळहळ व्यक्त होत आहे.
