(रत्नागिरी / वार्ताहर)
भविष्यात उद्भवू शकणाऱ्या पाणीटंचाईवर प्रभावी उपाययोजना करण्यासाठी जलस्रोतांचे संवर्धन, पाण्याचा काटकसरीने वापर आणि नियोजनबद्ध जलव्यवस्थापन याबाबत जनजागृती करण्याच्या उद्देशाने आयोजित करण्यात आलेली ‘रत्नागिरी जिल्हा शाश्वत पाणी परिषद’ उत्साहात संपन्न झाली. या परिषदेला आमदार प्रमोद जठार यांची प्रमुख उपस्थिती होती.
रत्नागिरी पर्यटन सहकारी सेवा संस्था मर्यादित, हिरवळ प्रतिष्ठान आणि जिल्हा प्रशासन यांच्या संयुक्त विद्यमाने जिल्हा नियोजन सभागृहात या परिषदेचे आयोजन करण्यात आले होते. ‘भविष्यातील पाणीटंचाई, पाणी नियोजन’ हा परिषदेचा प्रमुख विषय होता.
वाढती लोकसंख्या, बदलते हवामान, पावसाच्या स्वरूपातील बदल आणि उपलब्ध जलस्रोतांवर वाढणारा ताण लक्षात घेता भविष्यातील पाण्याची गरज भागविण्यासाठी आतापासूनच शाश्वत नियोजन करणे आवश्यक असल्याचे परिषदेत अधोरेखित करण्यात आले. पाण्याचे महत्त्व लक्षात घेऊन उपलब्ध जलसंपत्तीचे जतन करणे आणि तिचा योग्य वापर करणे ही काळाची गरज असल्याचेही यावेळी स्पष्ट करण्यात आले.
परिषदेत जलसंधारणाची कामे, पावसाच्या पाण्याचे संकलन, भूजल पातळीत वाढ, नैसर्गिक व पारंपरिक जलस्रोतांचे संवर्धन, पाणीगळती रोखणे आणि उपलब्ध पाण्याचा कार्यक्षम वापर अशा विविध विषयांवर चर्चा करण्यात आली. ग्रामीण भागातील पारंपरिक जलस्रोतांचे जतन करण्याबरोबरच आधुनिक तंत्रज्ञानाचा उपयोग करून पाण्याचे प्रभावी व्यवस्थापन करण्यावरही भर देण्यात आला.
आमदार प्रमोद जठार यांनी परिषदेला उपस्थित राहून जलप्रश्नाशी संबंधित विविध विषयांची माहिती घेतली. पाणीटंचाईवरील उपाययोजनांना व्यापक स्वरूप देण्यासाठी प्रशासन, जलक्षेत्रात कार्यरत संस्था, जलप्रेमी, जलदूत, जलसेवक आणि नागरिक यांनी समन्वयाने काम करण्याची आवश्यकता यावेळी व्यक्त करण्यात आली.
रत्नागिरी जिल्ह्यातील पाणीप्रश्नावर दीर्घकालीन आणि परिणामकारक उपाययोजना राबविण्यासाठी लोकसहभाग वाढविणे, उपलब्ध जलस्रोतांचे संवर्धन करणे आणि पाण्याचे नियोजनबद्ध व्यवस्थापन करणे महत्त्वाचे असल्याचे परिषदेत नमूद करण्यात आले.
या परिषदेच्या माध्यमातून ‘पाणी वाचवा, पाणी जपवा आणि भविष्यासाठी पाणी सुरक्षित ठेवा’ हा संदेश जनमानसात पोहोचविण्याचा प्रयत्न करण्यात आला. भविष्यातील संभाव्य पाणीटंचाईचा सामना करण्यासाठी जलसंधारण आणि शाश्वत पाणी नियोजनाबाबत सामूहिक प्रयत्नांची गरजही या परिषदेतून अधोरेखित झाली.
