(रत्नागिरी / प्रतिनिधी)
ऑक्टोबर महिन्याचा उत्तरार्ध सुरू झाला तरी रत्नागिरी जिल्ह्यातील महसूल विभागातील अनेक कर्मचाऱ्यांचे वेतन अद्यापही बँक खात्यात जमा न झाल्याचा प्रकार समोर आला आहे. विशेष म्हणजे, याच विभागातील काही कर्मचाऱ्यांचे वेतन वेळेत जमा झाले असताना, अनेक जण मात्र अजूनही वेतनाच्या प्रतीक्षेत आहेत. वेतन वितरणातील या ढिसाळ आणि विसंगत कारभारामुळे महसूल वर्तुळातून तीव्र संताप व्यक्त केला जात असून प्रशासकीय नियोजनाचा पुरता बोजवारा उडाल्याचे चित्र आहे.
अनेक शासकीय कर्मचारी हे घरखर्च, मुलांचे शिक्षण, गृहकर्ज किंवा वाहन कर्जाचे हप्ते, तसेच जीवन विमा हप्ते यांसारख्या विविध मासिक आर्थिक दायित्वांवर अवलंबून असतात. महिन्याच्या ठरावीक तारखेला वेतन जमा न झाल्याने अनेकांचे बँकांचे मासिक हप्ते (EMIs) रखडले असून, त्यांना विनाकारण भुर्दंड आणि मानसिक त्रासाला सामोरे जावे लागत आहे. आधीच महागाईचे चटके बसत असताना, हक्काचे वेतन वेळेत न मिळाल्याने कर्मचाऱ्यांचे संपूर्ण कौटुंबिक बजेट कोलमडले आहे. एकाच विभागातील काही कर्मचाऱ्यांच्या खात्यात वेतनाची रक्कम जमा होते आणि काही कर्मचाऱ्यांना मात्र ताटकळत ठेवले जाते, यामागील नेमके गुढ काय? असा प्रश्न आता उपस्थित होत आहे. तांत्रिक बिघाड की निधीची कमतरता, याबाबत संबंधित ट्रेझरी (कोषागार) किंवा महसूल प्रशासनाकडून कोणतीही अधिकृत माहिती अथवा कारण स्पष्ट करण्यात आलेले नाही. प्रशासनाच्या या अनास्थेमुळे कर्मचाऱ्यांमध्ये कमालीचा संभ्रम आणि चिंतेचे वातावरण निर्माण झाले आहे.
सध्या सणासुदीचे दिवस तोंडावर असताना प्रशासनाने या गंभीर बाबीची तात्काळ दखल घेणे गरजेचे आहे. वेतन वितरणातील तांत्रिक खोळंबा किंवा प्रशासकीय त्रुटी तात्काळ दूर करून, प्रलंबित असलेले वेतन त्वरित कर्मचाऱ्यांच्या खात्यात वर्ग करावे, अशी आग्रही मागणी आता जोर धरू लागली आहे. शासकीय सेवा अखंडित ठेवणारे कर्मचारी आर्थिक कोंडीत सापडले असताना, जिल्हा प्रशासन यावर नेमकी काय आणि किती वेगाने उपाययोजना करते, याकडे सर्वांचे लक्ष लागले आहे.
