(संगमेश्वर / एजाज पटेल)
करजुवे, ता. संगमेश्वर येथील ज्येष्ठ प्रगतशील शेतकरी, निष्ठावंत शिवसैनिक, अभ्यासू समाजसेवक आणि अजातशत्रू व्यक्तिमत्त्व मोहनराव विचारे (वय ७२) यांचे २ सप्टेंबर २०२६ रोजी निधन झाले. त्यांच्या निधनाने करजुवे गावासह खाडीपट्टा आणि संगमेश्वर तालुक्यात शोककळा पसरली आहे.
मोहनराव विचारे यांनी आपल्या दिलदार आणि आपुलकीच्या स्वभावामुळे परिसरात मोठा मित्रपरिवार जोडला होता. राजकीय आणि सामाजिक क्षेत्रात कार्यरत असताना त्यांनी सर्वसामान्यांच्या प्रश्नांसाठी सातत्याने आवाज उठवला. त्यांच्या अकस्मात निधनाने कुटुंबीय, ग्रामस्थ आणि मित्रपरिवाराला मोठा धक्का बसला आहे.
मोहनराव विचारे हे शालेय जीवनापासून कबड्डीचे चाहते होते. त्यांनी प्रत्यक्ष मैदानावरही उल्लेखनीय कामगिरी करत उत्कृष्ट कबड्डीपटू म्हणून खाडीपट्ट्यात नावलौकिक मिळवला. क्रीडा क्षेत्रातील शिस्त, चिकाटी आणि संघर्षाची वृत्ती त्यांनी पुढील सामाजिक व राजकीय वाटचालीतही कायम जपली.
समाजकारण आणि राजकारणात काम करताना अनेक अडचणींचा सामना करूनही त्यांनी कधी माघार घेतली नाही. ग्रामपंचायतीचे अनेक वर्षे सदस्य तसेच विकास सोसायटीचे संचालक म्हणून त्यांनी काम केले. शेतकरी आणि ग्रामीण भागातील विविध प्रश्नांसाठी त्यांनी प्रशासनाकडे सातत्याने पाठपुरावा केला.
बाहेरून कणखर आणि आक्रमक वाटणारे मोहनराव स्वभावाने मितभाषी आणि संवेदनशील होते. चेहऱ्यावरचे प्रसन्न हास्य आणि आपुलकीची वागणूक यामुळे ते सर्वांना आपलेसे वाटत. राजकीय किंवा वैचारिक मतभेद वैयक्तिक संबंधांमध्ये न आणता त्यांनी सर्वांशी जिव्हाळ्याचे संबंध जपले. त्यामुळेच परिसरात त्यांची अजातशत्रू व्यक्तिमत्त्व म्हणून ओळख निर्माण झाली होती.
खाडीपट्ट्यातील गरीब आणि गरजू मुलांना शिक्षणाच्या संधी मिळाव्यात, यासाठी त्यांनी शैक्षणिक क्षेत्रालाही सहकार्य केले. शाळा-महाविद्यालयांच्या विविध उपक्रमांना त्यांचा पाठिंबा राहिला. परिसरातील नागरिकांच्या सुख-दुःखात ते आवर्जून सहभागी होत असत. कोणत्याही व्यक्तीच्या अडचणीच्या वेळी मदतीसाठी धावून जाणारा कार्यकर्ता म्हणून त्यांची ओळख होती.
मोहनराव विचारे यांच्या पार्थिवाचे अंतिम दर्शन घेण्यासाठी खाडीपट्ट्यासह संगमेश्वर तालुक्यातील राजकीय, सामाजिक, शैक्षणिक आणि क्रीडा क्षेत्रातील मान्यवर तसेच नागरिक मोठ्या संख्येने उपस्थित होते. शोकाकुल वातावरणात त्यांना अखेरचा निरोप देण्यात आला. त्यांच्या निधनाने परिसराने एक खंबीर मार्गदर्शक आणि आपुलकीचा सहकारी गमावल्याची भावना नागरिकांनी व्यक्त केली.
त्यांच्या पश्चात पत्नी, मुलगा, दोन मुली, भाऊ, पुतणे, पुतणी, सून, जावई आणि नातवंडे असा परिवार आहे..कै. मोहनराव विचारे यांचा दहावा विधी शुक्रवार, ११ सप्टेंबर २०२६ रोजी विचारेकोंड (करजुवे) येथे होणार आहे. बारावा विधी रविवार, १३ सप्टेंबर २०२६ रोजी करजुवे येथील त्यांच्या मूळ निवासस्थानी संपन्न होणार आहे.
