नेपाळमध्ये दोन दिवसांपूर्वी आलेल्या भीषण पुरातून नागरिक सावरण्याचा प्रयत्न करत असतानाच आता पुन्हा महापुराचे संकट निर्माण झाले आहे. नेपाळ-चीन सीमाभागात भूस्खलनामुळे तयार झालेल्या जलसाठ्यात पाण्याची पातळी सातत्याने वाढत असल्याने हा जलसाठा कधीही फुटण्याची भीती व्यक्त करण्यात येत आहे. जलसाठा फुटल्यास आधीच्या पुरापेक्षा तब्बल पाच पट अधिक मोठा पूर येण्याचा धोका असल्याने प्रशासनाने नदीकाठच्या भागातील नागरिकांचे स्थलांतर सुरू केले आहे.
त्रिशूली परिसरात पुन्हा सतर्कतेचा इशारा
नेपाळमधील त्रिशूली परिसरात वरच्या भागातून मोठ्या प्रमाणात पाण्याचा प्रवाह येण्याची शक्यता आहे. त्यामुळे त्रिशूली नदीची पाणीपातळी अचानक वाढण्याचा धोका निर्माण झाला आहे. परिस्थितीची गंभीरता लक्षात घेऊन प्रशासनाने नदीकाठच्या नागरिकांना सुरक्षित स्थळी हलवण्यास सुरुवात केली आहे. या नव्या धोक्यामुळे बचाव आणि शोधमोहीमेसमोरही मोठे आव्हान उभे राहिले आहे.
नुवाकोट जिल्ह्याला महापुराचा मोठा धोका
नुवाकोट जिल्ह्यात प्रशासनाने नागरिकांना सतर्कतेचा इशारा दिला आहे. धुंडे बाजार आणि आसपासच्या परिसरातील रहिवाशांना तातडीने सुरक्षित ठिकाणी स्थलांतरित होण्याच्या सूचना देण्यात आल्या आहेत. पाण्याची पातळी झपाट्याने वाढत असल्याने पुढील काही मिनिटांत पुराचे पाणी या भागात पोहोचण्याची शक्यता असल्याचे अधिकाऱ्यांनी सांगितले.
धुंडे बाजार परिसरात पोलिस आणि प्रशासकीय पथके नदीकाठच्या नागरिकांना सुरक्षित स्थळी हलवण्यासाठी कार्यरत आहेत. नागरिकांनी घरे आणि दुकाने रिकामी करून तातडीने सुरक्षित ठिकाणी जावे, यासाठी प्रशासनाकडून वारंवार सूचना दिल्या जात आहेत. परिस्थिती गंभीर असून कोणत्याही प्रकारचा निष्काळजीपणा जीवावर बेतू शकतो, असा इशाराही पोलिसांनी दिला आहे.
नदीकाठच्या नागरिकांना सुरक्षित स्थळी जाण्याचे आवाहन
नेपाळ पोलिसांनी सुरक्षा कर्मचारी, मदत व बचाव पथके तसेच नागरिकांना सतर्क राहण्याचे आवाहन केले आहे. आपल्या आसपासच्या नागरिकांनाही संभाव्य धोक्याची माहिती देऊन सुरक्षित ठिकाणी जाण्यास मदत करावी, असे आवाहन करण्यात आले आहे. पाण्याचा प्रवाह वेगाने खाली येण्याची शक्यता असल्याने प्रशासनाकडून संवेदनशील भागांमध्ये विशेष खबरदारी घेतली जात आहे.
आधीच्या पुरामुळे मोठे नुकसान
नुवाकोट आणि परिसरातील भागांना भोटेकोशी-त्रिशूली नदीच्या पुराचा मोठा फटका बसला आहे. पुरामुळे अनेक रस्ते आणि पूल मोठ्या प्रमाणावर बाधित झाले आहेत. अशा परिस्थितीत पुन्हा पुराचा धोका निर्माण झाल्याने बचावकार्य अधिक कठीण झाले आहे. संभाव्य पूर आधीच्या पुरापेक्षा अनेक पटींनी अधिक गंभीर ठरू शकतो, अशी भीती स्थानिक प्रशासनाकडून व्यक्त करण्यात आली आहे.
मृतांचा आकडा ४५० वर; १५०० हून अधिक बेपत्ता
दरम्यान, नेपाळमधील या भीषण नैसर्गिक आपत्तीत मृतांचा आकडा ४५० वर पोहोचल्याचे सांगण्यात येत आहे. १५०० हून अधिक नागरिक बेपत्ता असल्याची माहिती समोर आली आहे. भारतातील २९० हून अधिक नागरिकही बेपत्ता असल्याचे वृत्त आहे. त्यामुळे आपत्तीग्रस्त भागात मदत आणि बचावकार्य वेगाने सुरू आहे.
नव्या पुराच्या शक्यतेमुळे नागरिकांमध्ये भीतीचे वातावरण निर्माण झाले आहे. जलसाठ्यातील पाणी आणखी वाढल्यास अचानक मोठ्या प्रमाणावर पाण्याचा प्रवाह खाली येण्याची शक्यता असल्याने प्रशासन परिस्थितीवर बारकाईने लक्ष ठेवून आहे. धोकादायक भागातील नागरिकांना सुरक्षित स्थळी हलवण्याचे काम सुरू असून बचाव पथकांकडून परिस्थितीचा सातत्याने आढावा घेतला जात आहे.
