(चिपळूण / वार्ताहर)
शिक्षण व्यवस्थेतील कथित अनागोंदी, नीट (NEET) परीक्षेतील कथित पेपरफुटी प्रकरण आणि विद्यार्थी-युवकांवरील कथित लाठीहल्ल्याच्या निषेधार्थ चिपळूण शहरात काँग्रेस पक्षाच्या वतीने आंदोलन करण्यात आले. या वेळी केंद्र सरकारविरोधात जोरदार घोषणाबाजी करत केंद्रीय शिक्षणमंत्री धर्मेंद्र प्रधान यांनी नैतिक जबाबदारी स्वीकारून राजीनामा द्यावा, अशी मागणी आंदोलनकर्त्यांनी केली.
काँग्रेसच्या रत्नागिरी जिल्हाध्यक्ष सोनललक्ष्मी घाग यांच्या नेतृत्वाखाली झालेल्या या आंदोलनात मोठ्या संख्येने पक्षाचे पदाधिकारी, लोकप्रतिनिधी, महिला पदाधिकारी, युवक कार्यकर्ते आणि काँग्रेसचे कार्यकर्ते सहभागी झाले होते.
आंदोलनादरम्यान नीट परीक्षेतील कथित अनियमितता आणि पेपरफुटीमुळे लाखो विद्यार्थ्यांच्या भविष्याशी खेळ झाल्याचा आरोप करण्यात आला. या प्रकरणाची सखोल चौकशी करून दोषींवर कठोर कारवाई करावी, तसेच केंद्रीय शिक्षणमंत्री धर्मेंद्र प्रधान यांनी नैतिक जबाबदारी स्वीकारून आपल्या पदाचा राजीनामा द्यावा, अशी मागणी करण्यात आली.
यावेळी विद्यार्थी-युवकांवरील कथित लाठीहल्ल्याचा निषेध व्यक्त करण्यात आला. तसेच विरोधी पक्षनेते राहुल गांधी यांच्यावरील कारवाईबाबतही आंदोलनकर्त्यांनी नाराजी व्यक्त केली. केंद्रीय गृहमंत्री अमित शहा यांनीही आपल्या पदाचा राजीनामा द्यावा, अशी मागणी आंदोलनादरम्यान करण्यात आली.
आंदोलनाच्या शेवटी विविध मागण्यांचे निवेदन पोलिस प्रशासनाकडे सादर करण्यात आले. शिक्षण व्यवस्थेत पारदर्शकता आणावी, विद्यार्थ्यांच्या भविष्याशी संबंधित प्रकरणांमध्ये निष्पक्ष चौकशी करून दोषींवर कठोर कारवाई करावी आणि विद्यार्थ्यांच्या हिताचे संरक्षण करावे, अशी मागणी आंदोलनकर्त्यांनी निवेदनाद्वारे केली.
