(वैभव पवार / गणपतीपुळे)
जागतिक दर्जाचे पर्यटन स्थळ व लाखो भाविकांचे श्रद्धास्थान असलेल्या गणपतीपुळे येथे थर्टी फर्स्ट व नवीन वर्षाच्या पार्श्वभूमीवर पर्यटकांची मोठी गर्दी होऊ लागली आहे या पार्श्वभूमीवर जयगड पोलिस ठाण्याकडून विशेष पोलीस बंदोबस्त तैनात करण्यात आला मंदिर परिसर आणि समुद्र किनाऱ्यावर विशेष लक्ष केंद्रित करण्यात आले आहे. या गर्दीच्या पार्श्वभूमीवर रत्नागिरी जिल्हा पोलीस दलाकडून ज्यादा पोलीस कर्मचारी बंदोबस्तासाठी गणपतीपुळे येथे पाठविण्यात आले आहेत. त्यामुळे जयगड पोलीस ठाण्याचे कर्मचारी आणि रत्नागिरी जिल्हा पोलीस दलाच्या पोलीस कर्मचाऱ्यांकडून पर्यटकांच्या गर्दीवर नियंत्रण ठेवले जाणार आहे.
सध्या या पर्यटन स्थळाच्या ठिकाणी नाताळ पर्यटन हंगाम सुरू असल्याने विविध ठिकाणचे पर्यटक दाखल होत असून थर्टी फर्स्ट आणि नवीन वर्षाच्या सुरुवातीला पर्यटकांकडून मोठा प्रतिसाद मिळेल असा अंदाज व्यक्त केला जात आहे. या ठिकाणी आलेल्या पर्यटकांकडून येथील देवदर्शन आणि समुद्र स्नानाचा विशेष आनंद लुटला जात असून समुद्रकिनाऱ्यावरील वॉटर वॉटर स्पोर्ट आणि उंच आकाशातील पॅराग्लायडिंगला देखील पर्यटकांची विशेष पसंती मिळत आहे. तसेच उंट, घोडे सफर एटीव्ही बाईक राईड आदींचा आनंद पर्यटकांकडून घेतला जात आहे.
एकूणच गणपतीपुळे तीर्थक्षेत्राकडे महाराष्ट्रातून तसेच देश-विदेशातील पर्यटकांची पावले आता वळू लागली असून सरत्या वर्षाला निरोप देण्यासाठी आणि नवीन वर्षाचे स्वागत करण्यासाठी गणपतीपुळे पर्यटन स्थळ सज्ज झाले आहे. या ठिकाणी सध्या जिल्हास्तरीय सरस महिला बचत गटांचे प्रदर्शन सुरू असल्याने या प्रदर्शनाला देखील पर्यटकांचा वाढता प्रसिद्ध मिळत असून दररोज मोठ्या संख्येने पर्यटक भेटी देत आहेत. त्यामुळे त्यामुळे थर्टी फर्स्ट आणि नवीन वर्षाच्या पार्श्वभूमीवर लाखो पर्यटक भेट देतील असा अंदाज व्यक्त करण्यात आला आहे.
