(रत्नागिरी /मुंबई प्रतिनिधी)
दहशतवादी कारवायांसाठी आर्थिक मदत केल्याच्या संशयावरून इस्लामिक स्टेट ऑफ इराक अँड सीरिया (ISIS) मॉड्यूल आणि पुणे कनेक्शन प्रकरणी अंमलबजावणी संचालनालयाने (ईडी) शुक्रवारी देशभर मोठी कारवाई करत एकाच वेळी ४० हून अधिक ठिकाणी छापेमारी केली. महाराष्ट्रासह दिल्ली, कोलकाता आणि उत्तर प्रदेशात ही धडक मोहीम राबवण्यात आली असून राज्यातील पडघा–बोरिवली परिसर, दमन तसेच रत्नागिरी जिल्ह्याचा यामध्ये समावेश आहे. रत्नागिरीत ईडीची छापेमारी झाल्याने जिल्ह्यात एकच खळबळ उडाली आहे.
ईडीने दहशतवादी निधी उभारणीच्या संशयावरून ठाणे जिल्ह्यातील पडघा, भिवंडी जवळील बोरिवली, दमन, पुणे, मालेगाव आणि रत्नागिरी जिल्ह्यातील चिपळूण तालुक्यातील एका उद्योजकाच्या कात कारखान्यावर धाड टाकली. गेल्या दोन दिवसांपासून रत्नागिरी जिल्ह्यातील संबंधित उद्योजकाच्या घरात ईडीचे अधिकारी ठाण मांडून तपास करत आहेत. खैर वृक्षाच्या तस्करीतून मिळालेला पैसा दहशतवादी कृत्यांसाठी वापरला जात असल्याचा संशय व्यक्त करत ही कारवाई आयकर विभाग आणि महाराष्ट्र एटीएसच्या सहकार्याने करण्यात आली आहे.
ईडीच्या एका अधिकाऱ्याने दिलेल्या माहितीनुसार, भिवंडी परिसरातील पडघा येथे गुरुवारी पहाटेपासून तपास सुरू असून एनआयए आणि एटीएसशी संबंधित प्रकरणाच्या अनुषंगाने राज्यात ४० ठिकाणी छापेमारी करण्यात आली. पडघा येथील बोरिवली गावात यापूर्वी झालेल्या कारवाईच्या धाग्यांवरून ही मोहीम राबवण्यात आली असून संशयितांच्या घरांची झडती सुरू आहे. संशयास्पद आर्थिक व्यवहारांचा तपास केला जात असून राष्ट्रीय तपास यंत्रणाही या तपासात ईडीला सहकार्य करत आहे.
दरम्यान, पडघा–बोरिवलीसह दिल्ली, कोलकाता, हजारीबाग, प्रयागराज, दमन आणि रत्नागिरी येथे झालेल्या छापेमारीत सुमारे साडेनऊ कोटी रुपयांची मालमत्ता जप्त करण्यात आली आहे. याशिवाय आरोपी व संशयितांची २५ बँक खाती गोठवण्यात आली असून विविध आक्षेपार्ह कागदपत्रे, डिजिटल उपकरणे तसेच स्थावर मालमत्तांशी संबंधित कागदपत्रेही ईडीच्या ताब्यात घेण्यात आली आहेत.
चिपळूण तालुक्यातील संबंधित उद्योजकाच्या कात कारखान्यावरही ईडीने छापा टाकत तपास सुरू केला आहे. यापूर्वी चेकद्वारे झालेल्या व्यवहारांप्रकरणी या उद्योजकाची एटीएसकडून चौकशी झाली होती. आता पुन्हा एकदा त्याच उद्योजकावर ईडीची कारवाई झाल्याने चर्चांना उधाण आले आहे. यावेळी ईडीचे अधिकारी थेट त्यांच्या घरापर्यंत पोहोचले आहेत.
उद्योजक आमदारांच्या जवळचा…
दरम्यान, हा उद्योजक एका पक्षाचा स्थानिक नेता असून तो एका आमदाराच्या जवळचा असल्याची चर्चा राजकीय वर्तुळात सुरू आहे. कारवाईच्या वेळी हा उद्योजक नागपूर येथे अधिवेशनासाठी गेला असल्याची माहिती असून अचानक झालेल्या छापेमारीमुळे त्याची आई आणि पत्नी घाबरल्याची चर्चा आहे. ईडीच्या अधिकाऱ्यांनी कुटुंबीयांना नोटीस बजावत संबंधित उद्योजकाला मुंबई येथील ईडी कार्यालयात हजर राहण्याचे आदेश दिल्याची माहितीही समोर आली आहे. या व्यापक कारवाईमुळे राज्यासह देशभरात दहशतवादी निधीप्रकरणी पुन्हा एकदा तपास यंत्रणांची सक्रियता अधोरेखित झाली असून पुढील तपासात आणखी महत्त्वाचे खुलासे होण्याची शक्यता व्यक्त केली जात आहे.
