(दापोली)
रत्नागिरी जिल्हापरिषद पुरस्कृत कोळबांद्रे केंद्राच्या केंद्रस्तरीय हिवाळी क्रीडा स्पर्धा सडवे येथे मोठ्या उत्साहात आणि शिस्तबद्ध वातावरणात पार पडल्या. ग्रामीण भागातील विद्यार्थ्यांच्या क्रीडा कौशल्याला व्यासपीठ मिळावे यासाठी दरवर्षी आयोजित केल्या जाणाऱ्या या स्पर्धांना यंदाही उत्तम प्रतिसाद मिळाला.
स्पर्धेचे उद्घाटन मोठ्या औत्सुक्याच्या वातावरणात करण्यात आले. गावचे सरपंच वसंत मेंगे, पोलीस पाटील रोशन पादड, तंटामुक्त समिती अध्यक्ष जयेंद्र कावणकर, ग्रामस्थ प्रतिनिधी सुरेश मेंगे आणि केंद्रप्रमुख संजय जंगम यांच्या हस्ते दीपप्रज्वलन करून कार्यक्रमाची सुरुवात झाली. उद्घाटनाच्या वेळी वक्त्यांनी शिक्षणासोबतच क्रीडाविकासाचे महत्त्व पटवून देत विद्यार्थ्यांना उत्स्फूर्त सहभागासाठी प्रोत्साहित केले.
दिवसभर विविध गटांमध्ये धावणे, लांब उडी, गोळाफेक, खो-खो, कबड्डी आदी स्पर्धा रंगल्या. केंद्रातील सर्व शाळांनी सहभाग नोंदवून क्रीडांगणावर चुरस निर्माण केली. त्यात जि.प. शाळा साखळोली क्र.१ येथील विद्यार्थ्यांनी उल्लेखनीय कामगिरी करत ३६ पैकी १७ बक्षिसे पटकावली आणि जनरल चॅम्पियनशीप आपल्या नावे केली. त्यांच्या या यशाचे उपस्थित मान्यवरांनी विशेष कौतुक केले.
बक्षीस वितरण सोहळ्यात गावतळे प्रभागाचे शिक्षणविस्तार अधिकारी बळीराम राठोड यांनी विद्यार्थ्यांना मार्गदर्शन करताना महत्त्वाचे प्रतिपादन केले. ते म्हणाले, “क्रीडा स्पर्धांमध्ये हार-जीत ही स्वाभाविक बाब आहे. मात्र केवळ निकालावर न बघता, नैपुण्य असलेल्या विद्यार्थ्यांच्या गुणांना योग्य ओळख मिळाली पाहिजे. एखादा संघ हरला म्हणून त्यातील गुणवंत खेळाडूंची दखल घेऊ नये असे नाही.” उलट अशा विद्यार्थ्यांची निवड करून त्यांना पुढील टप्प्यांवर स्पर्धा करण्यासाठी संधी देणे हीच खरी क्रीडासंस्कृती आहे. राठोड यांनी विजेत्यांचे अभिनंदन करत सर्व सहभागी विद्यार्थ्यांना उज्ज्वल भविष्यासाठी शुभेच्छा दिल्या.
कार्यक्रमाच्या यशस्वी आयोजनासाठी सडवे ग्रामस्थ, व्यवस्थापन समिती, केंद्रातील सर्व शिक्षकवृंद व स्वयंसेवकांनी विशेष परिश्रम घेतले. क्रीडांगणाची सजावट, विद्यार्थ्यांचे मार्गदर्शन, शिस्तबद्ध कारभार यामुळे स्पर्धा सुरळीतपणे पार पडल्या. केंद्रप्रमुख संजय जंगम हे अध्यक्षस्थानी होते.
कार्यक्रमाचे स्वागत मुख्याध्यापक शामराव वरेकर यांनी केले. तर संपूर्ण दिवस चाललेल्या क्रीडा उपक्रमानंतर शिक्षक विकास पटले यांनी मनःपूर्वक आभार मानून कार्यक्रमाची सांगता केली.
