(दापोली)
शहरात एक हृदयद्रावक घटना सर्वत्र हळहळ निर्माण करून गेली आहे. काळकाईकोंड, दापोली येथील रहिवासी आणि भाजी विक्रीचा व्यवसाय करणारा सुजल संतोष तडवळकर (वय २१) हा तरुण झोपेतच मृत्यूमुखी पडला. डॉक्टरांच्या माहितीनुसार, मायोकार्डियल इन्फेक्शनमुळे हृदयविकाराचा तीव्र झटका आल्याने त्याचे निधन झाले. तरुण वयात झालेल्या या अचानक मृत्यूने तडवळकर कुटुंबावर शोककळा पसरली असून, परिसरात हळहळ व्यक्त होत आहे.
मिळालेल्या माहितीनुसार, सुजल तडवळकर हा ३ ऑक्टोबर २०२५ रोजी रात्री जेवण करून नेहमीप्रमाणे झोपी गेला होता. दुसऱ्या दिवशी सकाळी उशीरपर्यंत तो उठला नाही, यावरून त्याच्या बहीणीचा मुलगा साहील श्रीकांत जाधव हा त्याला उठवण्यासाठी गेला. मात्र, सुजलच्या शरीरात कोणतीही हालचाल आढळली नाही. कुटुंबीयांनी तात्काळ त्याला भागवत हॉस्पिटल, दापोली येथे उपचारासाठी नेले. परंतु डॉक्टरांनी तपासणीअंती त्याला मृत घोषित केले.
डॉक्टरांनी अहवालात नमूद केले की, सुजलचा मृत्यू हृदय आणि श्वसनक्रिया बंद पडल्याने, म्हणजेच हृदयविकाराच्या तीव्र झटक्यामुळे झाला आहे. या घटनेनंतर दापोली पोलिसांनी आकस्मिक मृत्यूची नोंद केली आहे. अकाली निधनाने तडवळकर कुटुंब, नातेवाईक आणि मित्रपरिवार शोकाकुल झाला असून, सुजलच्या आठवणींनी काळकाईकोंड परिसरात शोककळा पसरली आहे. तरुणाच्या अंत्यसंस्कारासाठी मोठ्या संख्येने ग्रामस्थांनी उपस्थित राहून श्रद्धांजली अर्पण केली.
