( रत्नागिरी/ प्रतिनिधी )
फ्रँचायझी बिझनेस अग्रीमेंटच्या नावाखाली उच्च परताव्याचे आमिष दाखवत पुण्यातील ट्रेड विथ जॅझ असोसिएट प्रा. लि. (TWJ) या कंपनीने राज्यभरातील गुंतवणूकदारांची कोट्यवधी रुपयांची फसवणूक केल्याचे धक्कादायक प्रकरण उघडकीस आले आहे. यवतमाळ येथील चौघा गुंतवणूकदारांची तब्बल ३९ लाख रुपयांनी फसवणूक झाल्यानंतर, या कंपनीने एकूण ३ कोटी ३१ लाख रुपयांचा गंडा घातल्याचे समोर आले. या घटनेमुळे राज्यभरातील गुंतवणूकदारांमध्ये खळबळ उडाली आहे.
याप्रकरणी गजेंद्र श्रावण गणवीर (५५, रा. अंबिकानगर, यवतमाळ) यांनी अवधूतवाडी पोलिस ठाण्यात तक्रार दाखल केली. त्यानुसार पोलिसांनी कंपनीचे व्यवस्थापकीय संचालक समीर नार्वेकर (४०, रा. पुणे), संचालक नेहा नार्वेकर (३८, रा. पुणे), विभागीय व्यवस्थापक सागर मंचलवार (३८, रा. संभाजीनगर, यवतमाळ), शाखा व्यवस्थापक सूरज मडगुलवार (३७, रा. यवतमाळ) आणि लेखापाल नम्रता मडगुलवार (३५, रा. यवतमाळ) यांच्याविरोधात गुन्हा दाखल केला आहे.
४ टक्के व्याजाचे आमिष
कंपनीने गुंतवणूकदारांना दरमहा ३ ते ४ टक्के व्याज देण्याचे आमिष दाखवले होते. राज्यात तब्बल १६ शाखा असल्याचे भासवण्यात आले. शेअर बाजार गुंतवणुकीचे प्रशिक्षण, तसेच TWJ इव्हेंट, TWJ इनका, TWJ हॉस्पिटॅलिटी, TWJ लर्निंग आणि TWJ लॉजिस्टिक अशा उपकंपन्यांद्वारे प्रचंड नफा मिळेल, अशी स्वप्ने दाखवून गुंतवणूकदारांना जाळ्यात ओढण्यात आले.
चार जणांकडून ३९ लाख रुपये उकळल्याचे निष्पन्न
तक्रारदार गजेंद्र गणवीर यांच्या जावई ओमप्रकाश खांडेकर (रा. अमरावती) यांनी कंपनीत १० लाखांची गुंतवणूक केली. त्यानंतर गणवीर यांनी जानेवारी २०२४ ते सप्टेंबर २०२५ दरम्यान १४ लाख, त्यांच्या भावाने सदानंद गणवीर यांनी ५ लाख, तर वीरेंद्रसिंग चव्हाण यांनी १० लाख रुपये गुंतवले. अशा प्रकारे केवळ चार जणांकडून ३९ लाख रुपये उकळल्याचे निष्पन्न झाले आहे. राज्यभरातील गुंतवणूकदारांकडून अशा प्रकारे ३ कोटी ३१ लाखांचा गंडा घालण्यात आल्याचे प्राथमिक तपासात उघड झाले आहे. या प्रकरणाचा पुढील तपास सुरू असून, इतरही पीडित गुंतवणूकदार पुढे येण्याची शक्यता वर्तवली जात आहे.
