(मुंबई)
मुंबईतील लालबागच्या राजाच्या चरणी अर्पण केलेल्या दागिन्यांचा आणि मौल्यवान वस्तूंचा बहुप्रतीक्षित लिलाव मोठ्या उत्साहात सुरू झाला आहे. लिलावाला भाविक आणि नागरिकांनी मोठ्या संख्येने हजेरी लावून उत्स्फूर्त प्रतिसाद दिला आहे.
चांदीच्या गणेशमूर्तीने झाली सुरुवात
लिलावाची सुरुवात भाविकांनी अर्पण केलेल्या चांदीच्या गणेशमूर्तीपासून झाली. ही मूर्ती एका भाविकाने तब्बल ₹५१,००० रुपयांना विकत घेतली. यानंतर लिलावाचा रंगतदार सिलसिला अधिक जोमात सुरू झाला.
लाखोंची उलाढाल
आतापर्यंत अनेक मौल्यवान वस्तूंचा यशस्वी लिलाव झाला असून मंडळाच्या तिजोरीत लाखोंची रक्कम जमा झाली आहे.
- मोदक पिरॅमिड – ₹३०,०००
- चांदीचा मूषक – ₹३१,०००
- चांदीचा कलश – ₹४२,०००
- सोन्याची साखळी – ₹१,६६,०००
- स्वर्ण व रौप्य मोदक – ₹४१,०००
कोणकोणत्या वस्तू लिलावात?
या वर्षी लालबागच्या राजाच्या चरणी अर्पण झालेल्या वस्तूंमध्ये – चांदीचे व सोन्याचे मोदक, गदा, बॅट, चांदीची समई, चांदीचा उंदीर, रत्नजडित हार, कलश, तसेच मोदकांचे ताट यांचा समावेश असून त्यांचा लिलाव करण्यात येत आहे.
हा लिलाव गुरुवारी सायंकाळी सुरू झाला असून रात्री १० वाजेपर्यंत सुरू राहणार आहे. लिलाव पाहण्यासाठी परिसरातील नागरिक आणि भाविकांची मोठी गर्दी झाली आहे.
गेल्या वर्षीचा विक्रम
मागील वर्षी झालेल्या लिलावातून मंडळाला तब्बल ₹७० लाखांहून अधिक रक्कम प्राप्त झाली होती. यंदाही लिलावातून मोठ्या रकमेची अपेक्षा व्यक्त केली जात आहे.
