मॅट्रिमोनिअल साईटवरून मैत्री; लग्नाचं अमिष दाखवून महिलेची दहा लाख रुपयांची फसवणूक

(पुणे)

विवाह जुळविण्याच्या ऑनलाईन संकेतस्थळावरून ओळख झालेल्या एका तरुणाने लग्नाचे आमिष दाखवत पुण्यातील पिंपरी भागातील एका महिलेची तब्बल १० लाख रुपयांची फसवणूक केल्याची धक्कादायक घटना उघडकीस आली आहे. हा प्रकार २०२३ पासून १९ ऑगस्ट २०२५ या कालावधीत घडला असून, याप्रकरणी पिंपरी पोलीस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी महिलेची आरोपी तरुणाशी ओळख एका ऑनलाईन विवाह संकेतस्थळावरून झाली. ओळखीनंतर दोघांमध्ये संवाद वाढला आणि नातं मैत्रीतून लग्नाच्या वचनापर्यंत पोहोचलं. आरोपीने लग्नाचे आश्वासन देत महिलेचा विश्वास संपादन केला. यानंतर आरोपीने आपल्या आई-वडिलांच्या गंभीर आजारपणाचे, तसेच स्वतःच्या आर्थिक अडचणींचे कारण पुढे करत वेळोवेळी पैशांची मागणी केली. महिलेनेही त्याच्या विश्वासावर बँक ट्रान्सफर, क्रेडिट कार्ड आणि धनादेशाद्वारे एकूण ₹14,44,700 इतकी रक्कम दिली.

फक्त तीन लाखांची परतफेड, उर्वरित रक्कमेबाबत टाळाटाळ 
तपासात समोर आलेल्या माहितीनुसार, आरोपीने या पैकी केवळ ₹3,93,091 इतकी रक्कम परत केली. मात्र उर्वरित ₹10,51,609 परत न करता तो महिलेला टाळू लागला. एवढेच नव्हे, तर लग्न करण्यासही स्पष्ट नकार दिला, त्यामुळे महिलेची आर्थिक आणि भावनिक फसवणूक झाल्याचे स्पष्ट झाले. या घटनेनंतर महिलेने अखेर पिंपरी पोलीस ठाण्यात तक्रार दाखल केली. पोलिसांनी संबंधित तरुणाविरोधात फसवणुकीचा गुन्हा नोंदवून तपास सुरू केला आहे. आरोपी फरार असून, त्याचा शोध घेण्यात येत आहे.

या प्रकरणामुळे विवाह संकेतस्थळांच्या माध्यमातून होत असलेल्या फसवणुकीच्या घटनांबाबत पुन्हा एकदा गंभीर प्रश्नचिन्ह उपस्थित झाले आहे. लग्नाचे आमिष दाखवून आर्थिक फसवणूक करणाऱ्या टोळ्या, व्यक्ती सक्रिय असल्याचे संकेतही या घटनेतून मिळत आहेत. फसवणुकीच्या अशा घटनांमुळे ऑनलाईन माध्यमातून ओळख करताना अधिक सावधगिरी बाळगण्याची गरज आहे.