(चिपळूण)
किरकोळ वादातून सावर्डे येथे झालेल्या हाणामारीत एक व्यक्ती गंभीर जखमी झाली आहे. ही घटना १६ ऑगस्ट रोजी सकाळी साडेदहाच्या सुमारास सावर्डे बाजारपेठेतील एसटी स्टॉपजवळ उघडकीस आली. या प्रकरणी पोलिसांनी एका व्यक्तीविरुद्ध गुन्हा दाखल केला आहे.
जखमीचे नाव राजाराम महादेव घाणेकर (वय ४३) असे असून ते कामानिमित्त सावर्डेत आले होते. त्याचवेळी आरोपी पंढरीनाथ आत्माराम पिरधनकर हे चारचाकी गाडी घेऊन सर्व्हिस रोडवरून येत असताना, किरकोळ कारणावरून त्यांच्यात वाद झाला. राजाराम घाणेकर यांनी गाडीच्या बोनेटवर व आरशांवर मारून शिवीगाळ केली, अशी माहिती पोलिसांकडून देण्यात आली.
यामुळे संतापलेल्या पंढरीनाथ पिरधनकर यांनी गाडीतून उतरून राजाराम यांना जोरात धक्का दिला. या धक्क्याने ते मागे पडून सर्व्हिस रोडलगतच्या सिमेंटच्या कठड्यावर आपटले. यात त्यांच्या डाव्या कानाजवळ डोक्याला गंभीर दुखापत झाली आणि रक्तस्राव सुरू झाला. घटनेनंतर ते बेशुद्ध अवस्थेत कोसळले. तातडीने त्यांना डेरवण येथील वालावलकर रुग्णालयात उपचारासाठी दाखल करण्यात आले.
या घटनेची माहिती मिळाल्यानंतर जखमीचे भाऊ नारायण महादेव घाणेकर (वय ५३) यांनी सायंकाळी सहा वाजता पोलिस ठाण्यात फिर्याद नोंदवली. त्यानुसार पोलिसांनी आरोपी पंढरीनाथ पिरधनकर याच्यावर गुन्हा दाखल केला आहे. या प्रकरणाचा अधिक तपास स्थानिक पोलिस करीत आहेत.
