(संगमेश्वर / रत्नागिरी प्रतिनिधी)
संगमेश्वर तालुक्यातील कोसुंब रेवाळवाडी येथे मंगळवारी (२२ जुलै) रात्री उशिरा एक धक्कादायक घटना समोर आली आहे. सासरच्या कामांवरून निर्माण झालेल्या वादातून चिडलेल्या सुनेने आपल्या सासऱ्याच्या जेवणात विषारी द्रव्य टाकून त्यांचा जीव घेण्याचा प्रयत्न केल्याची धक्कादायक बाब उघडकीस आली आहे. विशेष म्हणजे, हेच विषारी अन्न पतीनेही सेवन केल्याने त्यालाही विषबाधा झाली आहे. या प्रकरणी देवरुख पोलिसांनी संबंधित सून स्वप्नाली सचिन सोलकर (३२) हिला अटक केली आहे.
स्वप्नालीचा विवाह १३ एप्रिल २०२५ रोजी सचिन सोलकर यांच्यासोबत झाला होता. विवाहानंतर सासरच्या घरातील साफसफाई, कचरा काढणे यांसारखी कामे सासरे जगन्नाथ सोलकर हे स्वप्नालीकडून घेत असत. मात्र, ही कामे न आवडल्याने राग मनात धरून तिने सासऱ्याच्या जेवणात विष मिसळल्याची माहिती पती सचिन सोलकर यांनी पोलीस ठाण्यात दिलेल्या तक्रारीत नमूद केली आहे.
ही घटना मंगळवारी रात्री ९.३० वाजण्याच्या सुमारास घडली. विषारी अन्न खाल्ल्यानंतर सासरे व पती दोघांनाही अचानक उलट्या व मळमळीसारखी लक्षणे जाणवू लागल्याने त्यांना तातडीने देवरुख ग्रामीण रुग्णालयात दाखल करण्यात आले. तेथून प्रकृती गंभीर असल्याने त्यांना पुढील उपचारासाठी रत्नागिरी जिल्हा शासकीय रुग्णालयात हलवण्यात आले. डॉक्टरांनी तपासणी केल्यानंतर दोघांनाही विषबाधा झाल्याचे स्पष्ट झाले. सध्या त्यांच्यावर उपचार सुरु असून प्रकृतीत सुधारणा होत आहे.
या घटनेची माहिती मिळताच पोलीस उपविभागीय अधिकारी निलेश माईनकर यांनी घटनास्थळी भेट देऊन पाहणी केली. तसेच, फॉरेन्सिक पथकही घटनास्थळी दाखल झाले. देवरुख पोलीस स्थानकात आज (२५ जुलै रोजी) गुन्हा दाखल करण्यात आला असून, आरोपी स्वप्नाली सोलकर हिला अटक करण्यात आली आहे. या प्रकारामुळे संपूर्ण संगमेश्वर तालुक्यात खळबळ उडाली असून, देवरुख पोलीस स्थानकाचे पोलीस निरीक्षक उदय झावरे या गुन्ह्याचा अधिक तपास करीत आहेत.
