( मंडणगड )
तालुक्यातील पाट ते शिरगावदरम्यानच्या अंतर्गत रस्त्यावर बुलेरो पिकअपने दिलेल्या जोरदार धडकेत ६५ वर्षीय महिला जागीच ठार झाली असून, पती जखमी झाल्याची दुर्दैवी घटना शनिवारी (२१ जून) सायंकाळी शिरगाव स्टॉप परिसरात घडली. या प्रकरणी मंडणगड पोलिसांनी बुलेरो चालकाविरोधात गुन्हा दाखल केला आहे.
या अपघातात मयत झालेल्या महिलाचे नाव जयश्री तुकाराम खेडेकर (वय ६५, रा. कोंडमालुसरे, ता. महाड, जि. रायगड) असे आहे. त्यांचे पती तुकाराम सिताराम खेडेकर (वय ६९) हे जखमी झाले असून, त्यांनीच या घटनेची फिर्याद दिली आहे. खेडेकर दाम्पत्य हे पाट (ता. मंडणगड) येथे नातेवाईकाच्या धार्मिक विधीसाठी आले होते. विधी कार्य आटपून ते दुचाकी (क्र. MH 04 JT 0058)वरून शिरगावकडे जात होते. सायंकाळी ५ वाजण्याच्या सुमारास शिरगाव स्टॉपजवळ आले असता, मंडणगडहून म्हाप्रळकडे जाणाऱ्या बुलेरो पिकअप (क्र. MH 07 AJ 3417) ने त्यांच्या दुचाकीला जोरदार धडक दिली. या अपघातात जयश्री खेडेकर यांचा जागीच मृत्यू झाला, तर तुकाराम खेडेकर यांना किरकोळ व मध्यम स्वरूपाच्या दुखापती झाल्या. पिकअपचा चालक सौरभ संदीप चौगुले (वय १८, रा. मालवण, ता. सावंतवाडी, जि. सिंधुदुर्ग) याच्याविरोधात मंडणगड पोलिसांनी गुन्हा दाखल केला आहे.
या प्रकरणी गुन्हा रजिस्टर नंबर २६/२०२५ नुसार भारतीय न्यायसंहिता २०२३ चे कलम १०६, २८१, १२५ (अ), १२५ (ब) व मोटार वाहन कायदा कलम १३२/१७७, १३४(ब), १७७, १८४ अंतर्गत कारवाई करण्यात आली आहे. या अपघात प्रकरणी पोलिस तपास सुरू असून, या अपघाताने खेडेकर कुटुंबावर दुःखाचा डोंगर कोसळला आहे. परिसरात हळहळ व्यक्त केली जात आहे.
