( रत्नागिरी )
रत्नागिरी जिल्ह्याचे कर्तव्यनिष्ठ, निस्वार्थी व जनतेत लोकप्रिय असलेले जिल्हा पोलीस अधीक्षक श्री. धनंजय कुलकर्णी यांची बदली मुंबई येथे अप्पर पोलीस आयुक्त (विशेष शाखा) या पदावर करण्यात आली आहे. त्यांच्या बदलीचे आदेश शुक्रवारी (दि. १६ मे) संध्याकाळी प्राप्त झाले असून, लवकरच ते नवी जबाबदारी स्वीकारणार आहेत.
श्री. कुलकर्णी यांनी रत्नागिरी जिल्ह्यात कार्यभार स्वीकारल्यानंतर त्यांच्या नेतृत्वाखाली अनेक महत्त्वाच्या घटनांचा यशस्वी व शांततेत सामना करण्यात आला. त्यांच्या कार्यकाळात लोकसभा व विधानसभा निवडणुका कोणत्याही अनुचित प्रकाराशिवाय अत्यंत शिस्तबद्ध व पारदर्शक पद्धतीने पार पडल्या. त्यांनी कायदा व सुव्यवस्था राखताना लोकाभिमुख दृष्टिकोन ठेवला आणि सर्वसामान्य जनतेशी दृढ नातं निर्माण केलं.
रत्नागिरीच्या ग्रामीण भागांपासून शहरी भागापर्यंत त्यांनी पोलिस खात्याची विश्वासार्हता वाढवण्यासाठी अनेक उपक्रम राबवले. विद्यार्थ्यांसाठी पोलिसांच्या वतीने घेण्यात येणारे मार्गदर्शन शिबिरे, महिला सुरक्षेसंदर्भातील जनजागृती मोहीमा, तसेच गुन्हेगारी नियंत्रणासाठी प्रभावी पावले उचलणे या बाबतीत त्यांचे योगदान लक्षणीय ठरले. त्यांच्या कार्यशैलीत कडक शिस्तीबरोबरच मानवतेचा स्पर्श होता.
श्री. कुलकर्णी हे केवळ एक प्रशासकीय अधिकारी म्हणूनच नव्हे तर एक संवेदनशील व्यक्तिमत्त्व म्हणून रत्नागिरीकरांच्या मनात घर करून गेले. त्यांनी सामान्य नागरिक, पत्रकार, सामाजिक कार्यकर्ते आणि विविध स्तरांतील लोकांशी नेहमी सुसंवाद ठेवला. कोणतीही तक्रार असो की सूचना – त्यांनी ती गांभीर्याने ऐकून घेऊन तत्पर प्रतिसाद दिला.
त्यांच्या बदलीची बातमी समजताच रत्नागिरीतील पोलिस दलासह नागरिकांमध्ये हळहळ व्यक्त करण्यात येत आहे. “शिस्त, कार्यक्षमता आणि माणूसपण यांचे समतोल साधणारा अधिकारी” अशी ओळख असलेल्या कुलकर्णी यांची आठवण रत्नागिरीकरांना सदैव राहील, असे मत अनेकांनी व्यक्त केले आहे.
