(रत्नागिरी /प्रतिनिधी)
महिला आणि बालकांच्या सुरक्षिततेबरोबरच त्यांच्या हक्कांविषयी समाजात जागरूकता निर्माण करण्यासाठी जिल्हा महिला व बाल विकास विभागाच्या मार्गदर्शनाखाली जिल्ह्यात विविध ठिकाणी जनजागृती कार्यक्रमांचे आयोजन करण्यात आले. ग्रामीण आणि दुर्गम भागातील महिलांपासून शालेय विद्यार्थ्यांपर्यंत कायदे, हक्क, शासकीय योजना आणि मदतीच्या उपलब्ध यंत्रणांची माहिती पोहोचविण्यावर या उपक्रमांत भर देण्यात आला.
लांजा तालुक्यात पोलीस पाटील यांच्या उपस्थितीत घेण्यात आलेल्या जनजागृती कार्यक्रमात महिलांसाठी असलेले विविध कायदे, शासनाच्या महिला कल्याणकारी योजना आणि महिला हेल्पलाईन १८१ याबाबत सविस्तर मार्गदर्शन करण्यात आले. महिलांना त्यांच्या हक्कांची जाणीव होण्याबरोबरच अन्याय किंवा अडचणीच्या प्रसंगी उपलब्ध असलेल्या कायदेशीर आणि प्रशासकीय मदतीची माहिती मिळावी, हा या उपक्रमामागील प्रमुख उद्देश होता. पोलीस पाटील यांच्या माध्यमातून ही माहिती गावागावांत आणि दुर्गम भागातील महिलांपर्यंत पोहोचविण्याचा प्रयत्न करण्यात आला.
दरम्यान, सेवा संकल्प अभियानांतर्गत गुहागर तालुक्यातील न्यू इंग्लिश स्कूल, पाठ पन्हाळे आणि न्यू इंग्लिश स्कूल, वरदान पाळपेणी येथे विद्यार्थ्यांसाठी स्वतंत्र जनजागृती कार्यक्रम घेण्यात आले. या वेळी विद्यार्थ्यांना बालविवाह प्रतिबंध, बाल संरक्षण आणि चाइल्ड हेल्पलाईन १०९८ याबाबत मार्गदर्शन करण्यात आले. बालविवाहाचे सामाजिक आणि वैयक्तिक दुष्परिणाम, बालकांचे मूलभूत हक्क, त्यांच्या सुरक्षिततेसाठी उपलब्ध असलेल्या सेवा तसेच संकटाच्या प्रसंगी मदत कुठे आणि कशी घ्यावी, याबाबत विद्यार्थ्यांना माहिती देण्यात आली. केवळ कायद्याची माहिती न देता, बालकांच्या सुरक्षिततेसाठी जागरूक नागरिक म्हणून भूमिका बजावण्याचे महत्त्वही या उपक्रमातून अधोरेखित करण्यात आले.
महिला आणि बालकांच्या हक्कांविषयीची माहिती केवळ कागदोपत्री न राहता ती तळागाळापर्यंत पोहोचावी, यासाठी अशा जनजागृती उपक्रमांना महत्त्व आहे. उपलब्ध शासकीय सेवा, हेल्पलाईन आणि कायदेशीर संरक्षण यंत्रणांची माहिती अधिकाधिक नागरिकांपर्यंत पोहोचवून महिला व बालकांच्या सुरक्षिततेसाठी सामूहिक सहभाग वाढविण्याचा संदेश या कार्यक्रमांतून देण्यात आला.
