(वाव्रे (बेल्जियम) /वृत्तसंस्था)
बचाव फळीच्या अभेद्य तटबंदीच्या जोरावर गतविजेत्या जर्मनीने रविवारी रंगलेल्या आंतरराष्ट्रीय हॉकी महासंघाच्या पुरुष हॉकी विश्वचषक स्पर्धेच्या अंतिम सामन्यात स्पेनवर १-० अशा निसटत्या फरकाने मात केली. या दिमाखदार विजयासह जर्मनीने चौथ्यांदा विश्वचषकावर नाव कोरले. यासह सर्वाधिक चार विश्वविजेतेपदे जिंकणाऱ्या पाकिस्तानच्या ऐतिहासिक जागतिक विक्रमाशी जर्मनीने बरोबरी साधली आहे. त्यामुळे जागतिक हॉकीच्या इतिहासात जर्मनी आणि पाकिस्तान हे संयुक्तपणे सर्वाधिक यशस्वी संघ ठरले आहेत.
अंतिम सामन्यात स्पेनने सुरुवातीपासूनच आक्रमक चढाया करत जर्मनीवर दबाव निर्माण करण्याचा प्रयत्न केला. मात्र, जर्मनीच्या शिस्तबद्ध बचाव फळीने आणि मध्यरक्षकांनी स्पेनच्या आक्रमणातील प्रत्येक प्रयत्न हाणून पाडला. सामन्यातील निर्णायक ठरलेला एकमेव गोल जर्मनीने अत्यंत कौशल्याने नोंदवला. त्यानंतर अखेरच्या क्षणापर्यंत भक्कम बचाव करत जर्मनीने १-० अशी आघाडी कायम राखली आणि विश्वचषकावर पुन्हा एकदा आपले नाव कोरले.
युरोपातील हॉकीची महासत्ता मानल्या जाणाऱ्या जर्मनीने यापूर्वी तीन वेळा विश्वचषकाचे जेतेपद पटकावले होते. या विजयामुळे त्यांच्या शिरपेचात आणखी एक मानाचा तुरा रोवला गेला आहे. जर्मनीने यापूर्वी २००२ मध्ये क्वालालंपूर, मलेशिया, २००६ मध्ये मोन्शेनग्लाडबाख, जर्मनी आणि २०२३ मध्ये भुवनेश्वर, भारत येथे झालेल्या विश्वचषक स्पर्धांमध्ये जेतेपदावर शिक्कामोर्तब केले होते.
स्पेनची चिवट झुंज व्यर्थ, जेतेपदाची प्रतीक्षा लांबली
दुसरीकडे, स्पेनचा संघ तब्बल २८ वर्षांनंतर, म्हणजेच १९९८ नंतर प्रथमच विश्वचषकाच्या अंतिम फेरीत पोहोचला होता. स्पेनची ही एकंदरीत तिसरी अंतिम फेरी होती. यापूर्वी १९७१ आणि १९९८ मध्ये स्पेनला उपविजेतेपदावर समाधान मानावे लागले होते. यंदाच्या स्पर्धेत स्पॅनिश संघाने उत्कृष्ट कामगिरी करत अंतिम फेरीपर्यंत मजल मारली. मात्र, निर्णायक सामन्यात गोल करण्यात आलेले अपयश त्यांना महागात पडले. परिणामी, पहिलेवहिले विश्वविजेतेपद पटकावण्याचे स्पेनचे स्वप्न पुन्हा एकदा अपूर्ण राहिले.
