(रत्नागिरी)
रत्नागिरी शहराला पाणीपुरवठा करणाऱ्या शीळ धरणातील पाणीसाठ्यात गेल्या आठवडाभरात मोठी घट झाल्याने पाणीटंचाईचे संकट अधिक गंभीर झाले आहे. कडक ऊन आणि पावसाने घेतलेल्या विश्रांतीमुळे धरणातील उपयुक्त साठा झपाट्याने कमी होत असून सध्या केवळ पुढील 20 ते 25 दिवस पुरेल इतकाच “जिवंत पाणीसाठा” शिल्लक असल्याचे प्रशासनाकडून स्पष्ट करण्यात आले आहे.
धरणातील पाणीसाठा एका आठवड्यात सुमारे 0.37 दशलक्ष घनमीटरने घटला आहे. सध्याची पातळी पाहता शहरातील पाणीपुरवठा व्यवस्थेत तातडीचे बदल करण्यात आले आहेत. खबरदारीचा उपाय म्हणून दर सोमवारचा पाणीपुरवठा अद्यापही बंद ठेवण्यात आला आहे.
शहरात सुमारे 12 हजार अधिकृत नळजोडण्या असून दररोज अंदाजे 20 दशलक्ष लिटर पाण्याची मागणी आहे. अशा परिस्थितीत धरणातील साठा वेगाने कमी होणे ही चिंतेची बाब ठरत आहे. चालू महिन्याच्या सुरुवातीला 2 जून रोजी शीळ धरणात केवळ 0.58 दशलक्ष घनमीटर पाणी शिल्लक होते. त्यानंतर 8 जून रोजी झालेल्या पावसामुळे पातळीत थोडी सुधारणा झाली आणि साठा 0.487 दशलक्ष घनमीटरपर्यंत पोहोचला होता. मात्र त्यानंतर पावसाने पुन्हा विश्रांती घेतल्याने आणि तापमान वाढल्याने बाष्पीभवनाचा वेग वाढला.
गेल्या काही दिवसांत धरणातील साठा पुन्हा घटून 0.450 दशलक्ष घनमीटरवर आला आहे. ही परिस्थिती पाहता प्रशासनाने पाणी जपून वापरण्याचे आवाहन नागरिकांना केले आहे. दरम्यान, जोरदार पावसाची प्रतीक्षा वाढली असून त्यानंतरच नियमित पाणीपुरवठा आणि सोमवारची पाणीबंदी हटवण्याचा निर्णय घेतला जाण्याची शक्यता आहे.
