(दापोली / प्रतिनिधी)
दापोली तालुक्यातील हर्णे परिसरात उसने दिलेल्या पैशांच्या वादातून व्यापाऱ्यावर काठीने हल्ला केल्याची धक्कादायक घटना उघडकीस आली आहे. १८ ऑक्टोबर २०२५ रोजी सायंकाळी साडेसातच्या सुमारास ही घटना घडली असून, दापोली पोलिसांनी संबंधित आरोपीविरुद्ध भारतीय न्याय संहिता अधिनियम २०२३ अंतर्गत गुन्हा दाखल केला आहे.
या प्रकरणी दिपक अशोक खेडेकर (वय ५०, व्यवसाय – व्यापार, रा. हर्णे, जुनी ब्राम्हणजाळी, ता. दापोली) यांनी दापोली पोलीस ठाण्यात फिर्याद दिली आहे. फिर्यादी यांच्या मते, घटनेच्या दिवशी संध्याकाळी ते भरत चुनेकर (पूर्ण नाव अज्ञात, रा. पाजपंढरी, ता. दापोली) याच्या घरी पाजपंढरी येथे गेले होते. त्यांनी चुनेकर याच्याकडे पूर्वी उसने दिलेले पैसे परत मागितले.
मात्र, पैशांची मागणी केल्याचा राग मनात धरून भरत चुनेकर याने दिपक खेडेकर यांच्यावर शिवीगाळ आणि धमक्यांचा पाऊस पाडला. “भडव्या, येथून चालू पड,” असे अश्लील शब्द उच्चारत त्याने घरातून काठी उचलली आणि खेडेकर यांच्यावर हल्ला चढवला. आरोपीने हातातील काठीने त्यांच्या उजव्या मनगटावर आणि डाव्या मांडीवर वार केले, यात त्यांना दुखापत झाली.
या घटनेनंतर दिपक खेडेकर यांनी तत्काळ दापोली पोलीस ठाण्यात धाव घेत १९ ऑक्टोबर रोजी मध्यरात्री तक्रार नोंदवली. पोलिसांनी तातडीने कारवाई करत गु. र. क्र. १९०/२०२५ नोंदवून आरोपी भरत चुनेकर याच्याविरुद्ध भारतीय न्याय संहिता अधिनियम २०२३ चे कलम ११८(१), ३५२ आणि ३५९(२) अंतर्गत गुन्हा दाखल केला आहे. या घटनेमुळे हर्णे परिसरात तणावाचे वातावरण निर्माण झाले असून, पोलिसांनी पुढील तपास सुरू केला आहे.
