(देवरूख / सुरेश सप्रे)
संगमेश्वर तालुक्यातील शिवणे-बुरंबी येथिल एका माध्यमिक शाळेत कार्यरत असलेल्या एका महिला शिक्षिकेबाबत अश्लील अफवा पसरवून बदनामी केली व शाळेत आयोजित केलेल्या व्यवस्थापन व प्रमुख ग्रामस्थांच्या सार्वजनिक सभेत लैंगिक शेरेबाजी केल्याप्रकरणी तिघांविरुद्ध संगमेश्वर पोलीस ठाण्यात गुन्हा दाखल झाल्याने शिक्षण क्षेत्रासह परिसरात एकच खळबळ उडाली आहे.
संगमेश्वर पोलीस ठाण्यातून मिळालेल्या माहितीनुसार ही घटना १३ जून २०२५ ते २६ जून २०२५ या कालावधीत घडली. याप्रकरणी एका शिक्षकेने संगमेश्वर पोलीस ठाण्यात ८ ऑक्टोबर रोजी तक्रार दाखल केली होती. या शिक्षिकेने दिलेल्या लेखी तक्रारीवरून तिघांविरुद्ध संगमेश्वर पोलिसांनी गुन्हा दाखल केला आहे.
या तक्रारीत सुनील दौलत दळवी (रा. तेर्ये), संदीप विष्णु नटे (रा. ताम्हाणे), व संदीप जयवंत जाधव(रा. काटवली) या तिघांनी संगनमत करून फिर्यादीबद्दल सदर शिक्षकेबद्दल अश्लील अफवा पसरवल्या. याशिवाय २६ जून रोजी शाळा सभागृहात संपन्न झालेल्या पंचक्रोशीतील प्रमुख ग्रामस्थांच्या सभेमध्ये अश्लील, घाणेरड्या आणि मनाला लज्जा उत्पन्न करणारी लैंगिक शेरेबाजी केल्याचे फिर्यादीत नमूद केले आहे.
या फिर्यादीवरून संगमेश्वर पोलीस ठाण्यात गु.र.नं. ११६/२०२५ अन्वये भारतीय दंड संहितेच्या कलम ७५(१)(४), ७५(३), ७९,३(५) दाखल करण्यात आला आहे. याप्रकरणी पोलीस निरीक्षक राजाराम चव्हाण अधिक तपास करत आहेत.
या तक्रारीची दखल घेऊन पोलिसांनी तपासाला सुरुवात झाल्यानंतर पालकांसह ग्रामस्थांनी समाधान व्यक्त करत अशा समाजविघातक प्रवृत्तीचा वेळीच ठेचून बिमोड करावा अशी अपेक्षा व्यक्त केली जात आहे. संशयित आरोपी फरार झाले असलेची कुजबूज सुरू असून ते अटकपूर्व जामिनासाठी धडपडत असलेचीही चर्चा परिसरात सुरू आहे.
