(रत्नागिरी)
दरवर्षीप्रमाणे यंदाही २७ सप्टेंबर रोजी “जागतिक पर्यटन दिन २०२५” महाराष्ट्र पर्यटन विकास महामंडळामार्फत राज्यभर उत्साहात साजरा करण्यात येणार आहे. यावर्षी युनायटेड नेशन ट्युरिझम यांच्याद्वारे घोषित करण्यात आलेल्या “पर्यटन आणि शाश्वत परिवर्तन” (Tourism and Sustainable Transformation)या घोषवाक्याशी अधीन राहून पर्यटनाशी संबंधित विविध उपक्रमांचे आयोजन करण्यात आले असल्याची माहिती महाराष्ट्र पर्यटन विकास महामंडळाचे प्रादेशिक व्यवस्थापक दिपक हरणे यांनी दिली आहे. तसेच महामंडळाने जागतिक पर्यटन दिनानिमित्त आयोजित केलेल्या सर्व उपक्रमांमध्ये भाग घेऊन पर्यटनाचा आनंद द्विगुणित करावा असे आवाहनही त्यांनी केले आहे.
जागतिक पर्यटन दिनानिमित्त पर्यटन आणि शाश्वत परिवर्तन या संयुक्त राष्ट्र संघाच्या थीमवर विशेष परिसंवाद आयोजित करण्यात येणार आहे. महाराष्ट्रातील पर्यटन क्षेत्रात शाश्वत आणि जबाबदार पर्यटनाचा संदेश देण्याचा व महाराष्ट्राच्या पर्यटनदृष्ट्या संपन्नता दाखविण्याचा या उपक्रमाचा उद्देश आहे. तसेच महाराष्ट्रातील पर्यटन संपन्नता अधोरेखित करण्यासाठी ई-ब्रोशर प्रकाशन व थीम बॅनर अनावरण ही करण्यात येणार आहे. नागरिकांसाठी ‘वॉक उपक्रम’ तसेच विद्यार्थ्यांसाठी निबंध व चित्रकला स्पर्धा, सर्व पर्यटक निवासे व उपहारगृहांमध्ये विशेष कार्यक्रम व पारंपारिक खाद्यपदार्थांची मेजवानी, पर्यटकांसाठी नेचर वॉक, जंगल ट्रेल व अनुभवात्मक पर्यटन उपक्रम राबविण्यात येणार आहेत. तसेच जागतिक पर्यटन दिनाचा अधिकृत लोगो व थीम बॅनर्स सर्वत्र प्रदर्शनासाठी ठेवले जातील जे Rethink Tourism या महामंडळाच्या ध्येयाचे प्रतिक असणार आहेत.
जागतिक पर्यटन दिनी एमटीडीसी प्रादेशिक कार्यालयामार्फंत जिल्ह्याच्या पालकमंत्री, विभागीय आयुक्त, जिल्हाधिकारी यांना तसेच नामवंत व्यक्ती, पर्यटन तज्ञ व पर्यटन व्यावसायिकांना उदा. टुर ऑपरेटर्स, सहल आयोजक, टुर्स असोसिएटस, हॉटेलियर्स, निवास न्याहरी इ. लोकांना निमंत्रित करुन परिसंवादाचे आयोजन करण्यात येणार आहे. परिसंवादामध्ये यावर्षीच्या घोषवाक्यप्रमाणे (Tourism and Sustainable Transformation) कार्यक्रमाची रुपरेखा आखण्यात आली आहे. यासाठी पर्यटन व हॉटेल व्यावसायिक, पर्यटन उद्योजक, विद्यार्थी इ. यांना निमंत्रित करण्यात येणार आहे. विभागातील महाविद्यालयांमध्ये Tourism and Sustainable Transformation या विषयावर प्रादेशिक व्यवस्थापक अथवा तज्ञ व्यक्तींचे व्याख्यान ठेवण्यात येणार आहे. यावेळी एमटीडीसीच्या पर्यटक निवासांच्या डिजीटल – माहितीपत्रकोच विमोचन या परिसंवादामध्ये मान्यवरांच्या हस्ते करण्यात येणार आहे.
पर्यटन मंत्री शंभुराज देसाई यांच्या नेतृत्वाखाली महामंडळाचे महाव्यवस्थापक चंद्रशेखर जयस्वाल हे समन्वय करीत असुन पर्यटन विभागाचे प्रधान सचिव डॉ. अतुल पाटणे, व्यवस्थापकिय संचालक निलेश गठणे मार्गदर्शन करीत आहेत.
जागतिक पर्यटन दिन हा पर्यटनाशी पुरेपुर निगडीत राहील व नियोजित उपक्रमांद्वारे पर्यटनवाढ वृध्दिंगत होवून राष्ट्रास व राज्यास नक्कीच हातभार लागेल, या दृष्टीने नाविन्यपूर्ण उपक्रम राबवून पर्यटन दिन साजरा करण्यात येणार आहे. अधिक माहितीसाठी अधिकृत संकेतस्थळाला www.mtdc.co येथे भेट द्यावी.
