(जैतापूर / राजन लाड)
जैतापूरमध्ये ईद-ए-मिलाद-उन-नबी निमित्त काढलेल्या जुलूसात हिंदू-मुस्लिम ऐक्य आणि बंधुत्वाचा सुंदर संदेश अनुभवायला मिळाला. जैतापूर जमातूल मुस्लिम कमिटीच्या वतीने जामा मशिदीपासून निघालेला हा जुलूस एसटी स्टँड परिसरात पोहोचला असता “जैतापूरचा राजा सार्वजनिक गणेशोत्सव मंडळा” तर्फे उत्साहपूर्ण स्वागत करण्यात आले.
या स्वागतावेळी सर्व सहभागी बांधवांना सरबताचे वाटप करण्यात आले. सागरी पोलीस ठाणे, नाटे येथील सहाय्यक पोलीस निरीक्षक प्रमोद वाघ आपल्या सहकाऱ्यांसह उपस्थित राहून धार्मिक सलोख्याचा संदेश दिला. त्यांनी दोन्ही समाजातील बांधवांचे कौतुक करून शुभेच्छाही दिल्या.
जुलूसात जमातूल मुस्लिम कमिटीचे अध्यक्ष जलाल काजी, ज्येष्ठ नागरिक शरफुद्दीन काजी, माजी अध्यक्ष सरफराज गुलामहुसेन काजी, रिजवान काजी यांसह अनेक मुस्लिम बांधव मोठ्या संख्येने सहभागी झाले होते. स्वागतावेळी गणेशोत्सव मंडळाचे अध्यक्ष गिरीश करगुटकर यांनी श्रीफळ व पुष्पगुच्छ देऊन मान्यवरांचे स्वागत केले.
“जैतापूरचा राजा सार्वजनिक गणेशोत्सव मंडळा” च्या दरबारात आमदार किरण उर्फ भैया शेठ सामंत यांनी जलाल काजी व त्यांच्या सहकाऱ्यांचे स्वागत करून शुभेच्छा दिल्या. हा उपक्रम खऱ्या अर्थाने हिंदू-मुस्लिम ऐक्य, धार्मिक सलोखा आणि बंधुतेचे दर्शन घडवणारा ठरला.
