(संगमेश्वर / एजाज पटेल)
मुसळधार पावसातही स्पर्धकांच्या उत्साहामुळे ११वी भक्तश्रेष्ठ कमलाकरपंत वालावलकर क्रॉसकंट्री स्पर्धा डेरवण येथे जल्लोषात पार पडली. एसव्हिजेसिटी क्रीडा संकुल व श्री विठ्ठलराव जोशी ट्रस्ट यांच्या संयुक्त विद्यमाने आयोजित या राज्यस्तरीय स्पर्धेत फुणगूस येथील नवजीवन विद्यालयाची विद्यार्थिनी गौरी शीतप हिने 14 ते 16 वर्ष वयोगटातील मुलींच्या 3000 मीटर धावण्याच्या स्पर्धेत तृतीय क्रमांक मिळवून ब्राँझ पदक पटकावले.
या यशामुळे शाळेचे नाव उज्ज्वल झाले असून गौरी ही शाळेच्या इतिहासातील पहिली विद्यार्थिनी ठरली आहे जिने राज्यस्तरीय क्रॉसकंट्री स्पर्धेत पदक मिळवले. आयोजकांकडून तिचा प्रशस्तिपत्र, ब्राँझ पदक व रोख रक्कम (₹1000) देऊन सन्मान करण्यात आला.
स्पर्धेत नवजीवन विद्यालयाच्या इतर विद्यार्थ्यांनीही सहभाग घेतला. त्यात 12 ते 14 वर्ष मुलींच्या 2 किमी धावण्यात सोनल शीतप, 12 ते 14 वर्ष मुले 3 किमी धावण्यात ओम थुळ व दुर्वेश मेस्त्री, 14 ते 16 वर्ष मुले 4 किमी धावण्यात आदर्श भुवड व स्वरूप थुळ यांनी सहभाग नोंदवला.
या स्पर्धेचे उद्घाटन आंतरराष्ट्रीय धावपटू शिवानी गायकवाड हिच्या हस्ते झाले. यावेळी शरयू यशवंतराव, डॉ. नेताजी पाटील, डॉ. चंद्रशेखर एल, अजित गालवणकर, संदीप तावडे, क्रीडा मार्गदर्शक सचिन मांडवकर, शिवछत्रपती क्रीडा पुरस्कार विजेते जगदीश नानजकर व क्रीडा संचालक श्रीकांत पराडकर आदी मान्यवर उपस्थित होते.
गौरीच्या यशाबद्दल शाळेचे मुख्याध्यापक सुनिल पाटील, संस्था अध्यक्ष चंदुभाई देशपांडे, उपाध्यक्ष डॉ. अरुण डिंगणकर, सचिव दिलीप कुळकर्णी तसेच सर्व शिक्षक व शिक्षकेतर कर्मचारी यांनी अभिनंदन करून पुढील वाटचालीस शुभेच्छा दिल्या.
तसेच फुणगूस परिसरातील ग्रामस्थ व सोशल मीडियावरील नागरिकांनी गौरी व इतर खेळाडूंवर अभिनंदनाचा वर्षाव केला. मान्यवरांच्या हस्ते पदक स्वीकारतानाचे गौरीचे फोटो व व्हिडिओ सोशल मीडियावर मोठ्या प्रमाणात शेअर होत असून, तिच्या मेहनतीचे व यशाचे कौतुक सर्वत्र होत आहे.
