(दापोली)
रत्नागिरी जिल्ह्यातील दापोली तालुक्यातील वाकवली नं. 1 जिल्हा परिषद आदर्श प्राथमिक शाळेने केंद्र सरकारच्या ‘पीएम श्री शाळा’ योजनेत देशातील सर्वोत्तम शाळांमध्ये स्थान मिळवून ऐतिहासिक पराक्रम केला आहे. या यशामुळे वाकवली गावासह संपूर्ण कोकणात अभिमान आणि आनंदाचे वातावरण निर्माण झाले आहे.
ब्रिटिशकालीन इतिहास लाभलेली ही शाळा 1896 साली स्थापन झाली असून, सध्या पहिली ते चौथीपर्यंत शिक्षण देत आहे. आधुनिक तंत्रज्ञान, शैक्षणिक सुविधा आणि नाविन्यपूर्ण उपक्रमांमुळे वाकवली शाळा शिक्षणाच्या क्षेत्रात आदर्शवत ठरली आहे. लवकरच नवी दिल्ली येथे केंद्रीय शिक्षणमंत्र्यांच्या हस्ते शाळेला ‘पीएम श्री’ पुरस्काराने गौरविण्यात येणार आहे.
या ऐतिहासिक निवडीबद्दल दापोलीचे आमदार आणि गृहराज्यमंत्री योगेशदादा कदम यांनी दूरध्वनीद्वारे शाळेचे मुख्याध्यापक, शिक्षकवर्ग आणि ग्रामस्थांचे अभिनंदन केले. “माझ्या मतदारसंघातील वाकवली नं. 1 शाळेची देशातील सर्वोच्च निवड ही माझ्यासह संपूर्ण कोकणवासीयांसाठी अभिमानाची बाब आहे,” असे ते म्हणाले. तसेच जिल्हा परिषदेच्या मुख्य कार्यकारी अधिकारी वैदेही रानडे आणि शिक्षणाधिकारी किरण लोहार यांनीही शाळेचे अभिनंदन केले.
आज शाळेत मुख्याध्यापक जावेद शेख, माजी मुख्याध्यापक विलास तांबे, सर्व शिक्षकवर्ग, शाळा व्यवस्थापन समिती सदस्य यांचा जिल्हा नियोजन समिती सदस्य निलेश शेठ, गट शिक्षणाधिकारी रामचंद्र सांगडे, विस्ताराधिकारी बळीराम राठोड, रेखा पवार तसेच केंद्रप्रमुख विलास धामणे यांच्या उपस्थितीत सत्कार करण्यात आला.
यावेळी सरपंच प्रणाली धुमाळ, उपसरपंच राजेंद्र तांबे, ग्रामपंचायत सदस्य, शाळा व्यवस्थापन समितीचे अध्यक्ष दुर्गेश जाधव, उपाध्यक्ष समीर कुरेशी तसेच सर्व सदस्य उपस्थित होते.
