(गणपतीपुळे / वैभव पवार)
रत्नागिरी तालुक्यातील मालगुंड एज्युकेशन सोसायटीच्या बळीराम परकर विद्यालय व मुरारी तथा भाई मयेकर ज्युनिअर कॉलेज मालगुंड यांचे वतीने यंदाच्या 76 व्या प्रजासत्ताक दिनानिमित्त ‘देश मेरा रंगीला’ या देशभक्तीपर गीतावर आधारित भारताच्या विविध प्रांतानुसार असलेल्या लोकसंस्कृतीचे वेशभूषेद्वारे आणि खास तालबद्ध नृत्यकलेद्वारे विविधतेतून एकतेचे दर्शन घडवले. संपूर्ण मालगुंड बाजारपेठेतून काढण्यात आलेली शोभायात्रा विशेष लक्षवेधी ठरली.
या शोभायात्रेत मालगुंड एज्युकेशन सोसायटीच्या संस्था चालकांनीही ठेका धरल्याने या शोभायात्रेने ग्रामस्थांचे विशेष लक्ष वेधून घेतले. तसेच मालगुंडच्या इतिहासात प्रथमच या शोभायात्रेचे आयोजन मालगुंड हायस्कूलचे मुख्याध्यापक बिपिन सदानंद परकर यांच्या विशेष संकल्पनेतून करण्यात आल्याने या शाळेच्या संस्थाचालकांचे आणि सर्व शिक्षक वर्गाचे विशेष कौतुक करण्यात आले. या शोभायात्रेमध्ये मालगुंड हायस्कूल व ज्युनिअर कॉलेजच्या सर्व विद्यार्थ्यांकडून भारतातील लोकसंस्कृतीचे आणि विविध प्रांतातील लोककलांचे दर्शन पारंपारिक वेशभूषेद्वारे आणि तालबद्ध नृत्यकलेद्वारे करण्यात आल्याने ही शोभायात्रा विशेष आकर्षण ठरली. तसेच या शोभायात्रेमध्ये भारतीय संविधानाचा सजवलेला भव्यदिव्य चित्ररथ तयार करण्यात आला होता. त्यामध्ये भारतीय संविधानाची खास प्रतिकृती तयार करण्यात येऊन भारतीय संविधानाचा सन्मान करण्यात आला. उपस्थित सर्वच लहान थोर ग्रामस्थ बंधू-भगिनींसाठी भारतीय संविधानाची जागृती करण्याचे काम खऱ्या अर्थाने विद्यार्थी वर्गाकडून करण्यात आले.
मालगुंड ग्रामपंचायत कार्यालय येथे 76 वा भारतीय प्रजासत्ताक दिन मोठ्या उत्साहात साजरा करण्यात आला. या ठिकाणी मालगुंड हायस्कूलच्या विद्यार्थ्यांची उपस्थिती मोठ्या संख्येने लाभली होती. यावेळी या प्रजासत्ताक दिनाच्या निमित्ताने सहभागी झालेल्या मालगुंड हायस्कूलच्या विद्यार्थ्यांनी ग्रामपंचायतीच्या प्रांगणात सुरुवातीला चित्तथरारक मानवी मनोरे रचत दर्शन घडवले. त्यानंतर मालगुंड ग्रामपंचायतीपासून संपूर्ण मालगुंड बाजारपेठ ते मालगुंड हायस्कूलपर्यंत काढण्यात आलेली शोभायात्रा अत्यंत लक्षवेधी ठरली. या शोभायात्रेची संकल्पना करणारे मुख्याध्यापक बिपिन परकर आणि त्यांचे सर्व शिक्षक वृंद तसेच शोभायात्रेमध्ये सहभागी झालेल्या सर्वच विद्यार्थ्यांचे मालगुंड ग्रामपंचायतीचे प्रमुख पदाधिकारी व सदस्य तसेच प्रतिष्ठित ग्रामस्थ आणि गावातील लहानथोर ग्रामस्थ बंधू भगिनींकडून विशेष कौतुक करण्यात आले. तसेच ही शोभायात्रा संपूर्ण मालगुंड पंचक्रोशी मध्ये विशेष लक्षवेधी आणि खास आकर्षण ठरल्याने मालगुंड हायस्कूलचे मुख्याध्यापक बिपिन परकर त्यांचे सर्व शिक्षक वृंद यांचे अभिनंदन होत आहे.
